सांगे: साळावली धरणातील पाणी अजूनही न ओसरल्‍याने कुर्डी गावातील श्रीस्थळ येथील श्री सोमेश्‍‍वर देवस्थानाचा यंदाचा रविवारी १८ मे रोजी होणारा वार्षिक उत्सव पुढे ढकलण्यात आला आहे. त्यासंबंधीची अधिकृत घोषणा उत्सव समितीने केली आहे.

वर्षभरात सुमारे दहा महिने साळावली धरण्याच्या पाण्याखाली असणारा श्रीस्थळ-कुर्डी हा परिसर मे महिन्यात पाणी ओसरल्यानंतर उघड्यावर पडतो. त्‍यामुळे प्रत्येक वर्षी मे महिन्याच्या तिसऱ्या रविवारी कुर्डी गावात पूर्वी वास्तव्याला असलेले श्री सोमेश्‍‍वराचे भक्तगण श्रीस्थळ येथे एकत्र येऊन एका दिवसाचा उत्सव साजरा करतात.

उत्सवाला धरणामुळे विस्थापित झालेले व गोव्याच्‍या विविध भागात वास्तव्याला असलेले सुमारे आठ ते दहा हजार भक्तगण तसेच कर्नाटकातील उत्तर कन्नड जिल्ह्यात असलेले देवाचे कुळावी मोठ्या संख्येने हजेरी लावतात. गानतपस्विनी कै. मोगुबाई कुर्डीकर व त्यांची कन्या गानसरस्वती कै. किशोरीताई आमोणकर यांचे जन्मगाव असल्याने गोव्यांतील नामांकित गायक, वादक या उत्सवाला उपस्‍थिती लावून श्री सोमेश्‍‍वरचरणी आपली कला पेश करतात.

उत्‍सवाची तयारी करण्‍यात अनंत अडचणी

तूर्त मंदिराकडे जाणारा रस्ता शीर-कुर्डी येथे पाण्याखाली आहे. त्यामुळे श्रीस्थळ येथे वाहने नेणे शक्य नाही. या उत्सवाची तयारी अगोदर पंधरा दिवसांपासून सुरू असते. पण मंडप उभारणे व इतर सामग्री नेणे शक्य नसल्याने उत्सव पुढे ढकलण्याशिवाय समितीपुढे पर्याय नव्‍हता.

पाणी ओसरणे कठीणच

यंदा थोडेसेच पाणी ओसरले आहे. श्री सोमेश्‍‍वर मंदिर जरी पाण्यावर आले असले तरी मंदिरापर्यंत जाणारा मुख्य रस्ता अजून पाण्याखाली आहे. पुढील आठ ते पंधरा दिवसांत पाणी ओसरण्याची शक्यता कमीच आहे. त्‍यामुळे यंदाचा १८ मे रोजी होणारा नियोजित उत्सव पुढे ढकलण्याचा निर्णय घेण्‍यात आला आहे. कदाचित उत्सव साजरा करणे शक्य असल्यास पुढील तारीख लवकरच जाहीर करू, असेही कळविण्‍यात आले आहे.