मडगाव: साळ नदीकाठी राहणाऱ्यांना विशेषतः असोळणा आणि आंबेलीदरम्यानच्या भागात अलीकडच्या काळात डासांच्या वाढत्या समस्येला तोंड द्यावे लागत आहे. या समस्येचे मूळ अद्याप निश्चित झालेले नसले, तरी अनेक रहिवाशांना असा संशय आहे की, दाट खारफुटीची वाढ आणि परिसरातील वटवाघळांची उपस्थिती ही डासांच्या पैदासीला कारणीभूत ठरत आहे. सायंकाळी ही समस्या जास्तच तीव्रपणे भेडसावते, असे त्या रहिवाशांचे म्हणणे आहे.

वाढत्या तक्रारींना प्रतिसाद देत वेळ्‍ळीचे आमदार क्रूझ सिल्वा यांनी असोळणा येथील कोलमवाडो आणि त्याच्या आसपासच्या परिसरांत धूर फवारणी करून घेतली असून किटकनाशके फवारणी करण्यासाठी एका खासगी कीटक नियंत्रण एजन्सीला नियुक्त केले आहे.

मासेमारी जेटीसाठी ओळखले जाणारे हे क्षेत्र सर्वांत जास्त प्रभावित झाले आहे. त्यामुळे येथील रहिवाशांनी लवकरात लवकर उपाययोजना करण्याची मागणी केली होती.

परिणाम पाहून पुढील उपाय करणार

रहिवाशांना सायंकाळी ६ ते रात्री ९ वा. या वेळेत डासांचा त्रास जास्त होतो. वटवाघळे उडून जातात त्या सुमारास दलदलीच्या परिसरातील कीटक वस्ती असलेल्या भागात प्रवेश करू शकतात, अशी चिंता लोकांना सतावत आहे.

पेडेर-आंबेलीमध्येही अशीच समस्या दिसून येत आहे. सध्याच्या मोहिमेचे निकाल पाहून आम्ही नदीकाठच्या परिसरात हेच उपाय पुढे वाढविण्याचा विचार करत आहोत, असे आमदार सिल्वा यांनी सांगितले.