Sal Temple Robbery: साळ, भटवाडी - उसप, डिचोली येथील श्री लक्ष्मी नारायण देवस्थानात रविवारी पहाटे काही चोरट्यांनी देवस्थानची फंड पेटी पळवली. त्यातील पैसे घेऊन फंडपेटी जवळच फेकून दिली.

देवस्थानचे पुजारी पूजा करायला पहाटे आले असता त्यांना घडलेला प्रकार लक्षात आला. त्यांनी ही बाब देवस्थान समितीच्या लक्षात आणून दिली.

देवस्थान समितीने त्वरित या घटनेची माहिती डिचोली पोलिसांना दिली. माहिती मिळताच डिचोली पोलिस घटनास्थळी दाखल झाले व चोरीचा पंचनामा केला.

घटनेची माहिती स्थानिक आमदार डॉ. चंद्रकांत शेट्ये यांना मिळताच तेही घटनास्थळी दाखल झाले. आमदार शेट्ये यांनी तिथे सीसीटीव्ही कॅमेरा बसविण्याचे देवस्थान समितीला आश्वासन दिले.

वर्षभरात या देवस्थानात दुसऱ्यांदा चोरीचा प्रकार घडला असून यापूर्वीही चोरी होऊन अज्ञातांनी फंड पेटी फोडून पैसे लंपास करून फंड पेटी फेकून दिली होती.

या वर्षात या देवस्थानात दुसऱ्यांदा चोरीचा प्रकार घडला आहे. डिचोली पोलिस अधिक तपास करीत आहे.