St Francis Xavier Exposition 2024 pope francis absent reason

तिसवाडी: ‘गोयचो सायब’ म्हणून प्रसिद्ध असलेले सेंट फ्रान्सिस झेवियर यांच्या पवित्र शवप्रदर्शन सोहळ्यास २१ नोव्हेंबरपासून सुरवात होणार आहे. साधनसुविधांची कामे अंतिम टप्प्यात पोहोचली आहेत; परंतु या सोहळ्याला रोमन कॅथोलिक चर्चचे धर्मगुरू पोप फ्रान्सिस यांची उपस्थिती लाभणार नाही; कारण त्यांना या सोहळ्याचे निमंत्रण देण्यात आलेले नाही.

पोप यांचे वेळापत्रक ठरलेले असल्याने त्यांना दोन वर्षांपूर्वी आमंत्रण पाठवले पाहिजे, अशी माहिती पार्थिव प्रदर्शन सोहळ्याच्या आयोजनाची जबाबदारी असलेल्या समितीचे सदस्य फादर हेन्री फाल्काव यांनी दिली.

दहा वर्षांनी एकदा होणारे शवप्रदर्शन ४५ दिवस चालणार असून मोठ्या संख्येत भाविक यासाठी येणार आहे. २१ नोव्हेंबर २०२४ ते ५ जानेवारी २०२५ दरम्यान हा सोहळा सुरू राहणार आहे. यावेळी दिल्लीचे आर्च बिशप अनिल कुटो हे उपस्थित राहणार आहेत. दरवर्षीप्रमाणे गोव्याचे मुख्यमंत्री, विरोधी पक्षनेते, मंत्री, आमदार आणि राजकीय नेत्यांची उपस्थिती लाभणार असल्याचे फा. फाल्काव यांनी स्पष्ट केले.

दरम्यान, प्रदर्शनाची तयारी जोमात सुरू असून जुने गोवे परिसरातील रस्ते हॉटमिक्स केले जात आहेत. निर्धारित वेळेनुसार २१ नोव्हेंबर रोजी सकाळी ९.३० वाजता प्रार्थना सभा होईल. २२ नोव्हेंबर ते ४ जानेवारीपर्यंत सकाळी ७ ते सायंकाळी ६ वाजेपर्यंत भाविकांना सेंट फ्रान्सिस झेवियर यांच्या पार्थिवाचे दर्शन घेता येणार आहे.

१७ नोव्हेंबर रोजी आढावा बैठक

मुख्यमंत्री डॉ. प्रमोद सावंत यांनी आढावा बैठक घेतली होती. त्यात ९० टक्के काम झाले असून १५ नोव्हेंबरपर्यंत बाकी काम पूर्ण होणार असल्याचे सांगितले होते. १७ नोव्हेंबर रोजी पुन्हा आढावा बैठक घेणार असल्याचे मुख्यमंत्र्यांनी सांगितले होते.