St Estevam River Tragedy

पणजी: सांतइस्तेव येथे कार बुडाल्यानंतर ३१ ऑगस्टच्या मध्यरात्रीनंतर बेपत्ता झालेल्या बाशुदेव भंडारी याचे प्रकरण अखेर केंद्रीय गृह मंत्रालयापर्यंत पोचले आहे. बाशुदेव यांची आई उमादेवी यांनी गुजरातेत भडोच येथील जिल्हा पोलिस अधीक्षक, आमदार आणि खासदारांना निवेदने सादर केली. ती निवेदने आता केंद्रीय गृह मंत्रालयाकडे पाठविण्यात आली आहेत.

बाशुदेव भंडारी यांचे कुटुंब मूळचे नेपाळमधील असले, तरी ते गुजरातेत भडोच येथे स्थायिक आहे. त्यामुळे गुजरातमधील एक युवक गोव्‍यात बेपत्ता झाल्याची खबर तेथील पोलिसांना देण्यात आली आहे. गृहमंत्री अमित शहा हे गुजरातमधील असल्याने ते या प्रकरणात लक्ष घालतील, असे भंडारी कुटुंबीयांना वाटते.

तपासकामाला गती; नारायण भंडारी

जुने गोवे पोलिसांनी कारमधून वाचलेल्या युवतीची आपल्या समक्ष जबानी घ्यावी, असा भंडारी कुटुंबीयांचा आग्रह आहे. बाशुदेवचे वडील नारायण आणि वडीलबंधू बलराम यांनी मुख्यमंत्री डॉ. प्रमोद सावंत यांची रविवारी भेट घेतल्यानंतर तपासकामाला गती आल्याचे त्यांना वाटते.