Wildlife Sanctuary in Goa : गोव्यात अनेक अभयारण्ये आहेत. यामध्ये विविध जाती-प्रजातीचे प्राणी तसेच पक्षी वास्तव्याला आहेत. या अभयारण्यांचा राज्याच्या पर्यटन विकासामध्ये महत्वाचा वाटा आहे. वनमंत्री डॉ. विश्वजित राणे यांनी नुकतेच आपल्या अधिकृत ट्विटर हँडलवरून अभयारण्यांबद्दलची महत्वाची माहिती दिली असून राज्यात लवकरच जंगल सफारी सुरू होणार असल्याचे बोलले जात आहे.

मंत्री विश्वजित राणे यांनी दिलेल्या माहितीनुसार, नेत्रावली किंवा मोले अभयारण्यात वन्यजीव सफारी पार्क उभारण्यासाठी त्यांनी पर्यावरण, वन आणि हवामान बदल मंत्रालयाकडे प्रस्ताव पाठवला आहे.

ते म्हणाले की, मी केंद्रीय पर्यावरण, वने आणि हवामान बदल आणि कामगार आणि रोजगार मंत्री भूपेंद्र यादव यांना या प्रस्तावासाठी काम करण्याची विनंती केली आहे. जर गोव्यातील अभयारण्यात सफारी पार्क झाले तर यामुळे राज्यभरातील पर्यटन उद्योगाला चालना मिळेल आणि त्याचा एकंदरीत अर्थव्यवस्थेला फायदा होईल.

या प्रस्तावामुळे गोव्यात येणारे पर्यटक हे फक्त बीचकडे न वळता इथल्या निसर्गाकडे वळू शकतात. आता विश्वजित राणे यांनी दिलेल्या या प्रस्तावाबाबत केंद्र सरकार काय निर्णय घेणार हे पाहणे महत्वाचे ठरणार आहे.