राज्यात लघु, मध्यम आणि सूक्ष्म उद्योजकांना आर्थिक साहाय्य करणाऱ्या गोवा सरकारच्या आर्थिक विकास महामंडळाचा 2021-22 या आर्थिक वर्षाचा करानंतरचा निव्वळ नफा 52.47 कोटी रुपये झाल्याची माहिती महामंडळाचे अध्यक्ष सदानंद शेट तानावडे यांनी दिली आहे.

या आर्थिक वर्षाच्या आर्थिक विवरणाला मंजुरी देण्यासाठी महामंडळाची बैठक झाली. यानंतर तानावडे बोलत होते. 2021-22 या आर्थिक वर्षात 75.58 कोटी रुपयांची उलाढाल झाली असून करानंतरचा एकूण नफा ५२.४७ कोटी झाला आहे.

कोविड महामारी काळात गोवा सरकारने हाती घेतलेल्या विविध मदतकार्यांना पाठिंबा देण्यासाठी महामंडळाच्या वतीने आपल्या सीएसआर निधीतून भरीव योगदान दिले आहे. व्यवस्थापकीय संचालक बी.एस. पै आंगले यांनी महामंडळाच्या कामकाजाची माहिती देत भागधारकांनी दिलेला पाठिंबा आणि सहकार्याबद्दल आभार व्यक्त केले.

गोवा सरकारची महत्त्वपूर्ण संस्था

तानावडे म्हणाले की, आर्थिक विकास महामंडळ हे गोवा सरकारची महत्त्वपूर्ण आर्थिक संस्था असून रिझर्व्ह बँकेकडे नोंदणीकृत आहे. संस्थेच्या वतीने सरकारच्या विविध आर्थिक योजना राबविल्या जातात. यात मुख्यमंत्री रोजगार योजना महत्त्वाची आहे. याबरोबरच राज्यात उद्योजक तयार व्हावेत यासाठी मार्गदर्शन आणि वित्तीय साहाय्य संस्था पुरवते.