Goa Environment: आम्ही अशा देशात जन्माला आलो आहोत, जेथे वृक्षांची पूजा केली जाते. पूर्वी कायदे-नियम नव्हते, तरीही निसर्गाचे संवर्धन होत होते. कारण निसर्गाशी भावना जोडलेल्या होत्या. आता केवळ आम्ही आमचा विचार करत पर्यावरणाचा उपभोग घेत आहोत, असे गोवा राज्य जैवविविधता मंडळाचे सचिव प्रदीप सरमोकादम यांनी केले.

दरम्यान, येथील छायापत्रकार संघटनेच्‍या कार्यालयात आयोजित ‘सेक्रेड फ्लोरा ऑफ गोवा’ या पुस्तकाच्या प्रकाशन सोहळ्यात ते बोलत होते. यावेळी व्यासपीठावर नाबार्डचे उपव्यवस्थापक विजय देशपांडे, लेखक व पर्यावरणप्रेमी राजेंद्र केरकर तसेच विवेकानंद पर्यावरण जागृती फौजचे अध्यक्ष चंद्रकांत शिंदे उपस्थित होते.

केरकरांचे लेखन हे केवळ लेखन नसून ते अनुभवाचे बोल आहेत, असे सरमोकादम म्‍हणाले. चंद्रकांत शिंदे यांनीही विचार मांडले. कार्यक्रमाचे सूत्रसंचालन नारायण गावस व समृद्धी केरकर यांनी केले तर विठ्ठल शेळके यांनी आभार मानले.

विजय देशपांडे, नाबार्डचे उपव्यवस्थापक-

पर्यावरण तुम्हा-आम्हा सर्वांचे आहे. पर्यावरणाबाबत जागृती होणे ही काळाची गरज आहे. झांडांविषयी बोलणे, लिहिणे, विचार करणे आवश्‍‍यक आहे. हे पुस्तक एक अतिशय चांगला उपक्रम असून नाबार्डने आपली सामाजिक बांधिलकी समजून सहकार्य केलंय.

राजेंद्र केरकर, पर्यावरणप्रेमी तथा लेखक-

पर्यावरण माझ्यासाठी जीवन आहे. ज्याप्रमाणे गोव्यात जंगलांची कत्तल होत आहे, ते पाहून अस्वस्थ व्हायला होते. रानांचे संवर्धन गरजेचे आहे. पर्यावरणाचे असंतुलन अनेक समस्या निर्माण करते आणि त्‍याचे विपरित परिणाम आम्‍ही आतापासून भोगत आहोत.