गोवा: विधानसभा निवडणुकीच्या पार्श्वभूमीवर लुईझीन फालेरो यांनी आपल्या आमदारकीचा राजीनामा देत काँग्रेस पक्षाला काही दिवसांपूर्वीच रामराम ठोकला होता. या नंतर फालेरो यांनी तृणमूल काँग्रेसमध्ये प्रवेश केला. परंतु मागील काही दिवस फालेरो यांच्या राजीनाम्याची चर्चा सुरू होती. दरम्यान यावर स्पष्टीकरण देत फालेरो म्हणाले, "मी तृणमूल काँग्रेसचा राजीनामा दिला आहे ह्या केवळ अफवा आहेत. गोमंतकीयांकडून तृणमूलला मिळणार्‍या पाठिंब्यामुळे नाराज झालेल्या लोकांकडून हा अपप्रचार चालू आहे." (Rumors of TMC National Vice President Luizin Falero's resignation in Goa)

फातोर्ड्यातून Fatorda उमेदवारी भरावी यासाठी तृणमूलकडून दबाव येत असल्यामुळे तृणमुलचे राष्ट्रीय उपाध्यक्ष लुईझीन फालेरो यांनी पक्षाचा राजीनामा दिल्याची अफवा समाज माध्यमातून फिरू लागल्याने राजकिय वर्तुळात गोंधळ उडाला.

मात्र नंतर तृणमुलने या वृत्ताचा इन्कार करणारे फालेरो यांचे ट्विट प्रसारित करून या वादावर पडदा टाकला. असे जरी असले तरी फालेरो यांनी अजून फातोर्ड्यातून उमेदवारी अर्ज भरलेला नाही.

फालेरो यांचे जे ट्विट प्रसारित करण्यात आले आहे त्यात आपण राजीनामा दिला हे असत्य असून तृणमूलची वाढती लोकप्रियता सहन होत नसल्याने ही अशी अफवा पसरविण्यात आली असल्याचे म्हटले आहे.

फालेरो याना कुठल्याही परिस्थितीत फातोर्डातून लढणे नको असून आपला निर्णय त्यांनी पक्षाला सांगूनही पक्षाने अजून उमेदवार न बदलल्याने फालेरो अत्यंत नाराज झालेले आहेत. त्याच पार्श्वभूमीवर आज हे राजीनाम्याचे वृत्त पसरले.

दरम्यान, तृणमुलतर्फे अजूनही फातोर्ड्यात कुणी उमेदवारी भरली नसून उद्या शेवटच्या दिवशी फालेरो उमेदवारी भरणार की दुसरा उमेदवार निवडणार याबद्दल राजकीय क्षेत्रात उत्सुकता आहे.