म्हापसा: शिवोली येथील २०२० मधील बहुचर्चित दुहेरी खून खटल्यात न्यायप्रविष्ट कैदी म्हणून गजाआड असलेली रोविना परेरा लोबो हिचा कोलवाळ कारागृहातील नवा प्रताप उघडकीस आला आहे. कारागृहातील ड्रग्स रॅकेटचा पर्दाफाश करत पोलिसांनी पुन्हा रोविनाच्या मुसक्या आवळल्या आहेत.

मिळालेल्या माहितीनुसार, १८ ऑगस्ट रोजी गोवा मानव संसाधन विकास महामंडळाची महिला सुरक्षा रक्षक आशा चोडणकर हिला ड्रग्स तस्करीप्रकरणी कारागृह प्रशासनाने रंगेहात पकडले होते. ती थर्मासच्या तळाशी गांजा लपवून कारागृहात नेण्याचा प्रयत्न करत होती. त्यानंतर तिच्या लॉकरमधून चरस, मोबाईल फोन आणि एटीएम कार्ड जप्त केले होते. याप्रकरणी कारागृह प्रशासनाच्या तक्रारीवरून कोलवाळ पोलिसांनी आशाला ताब्यात घेऊन चौकशी केली असता, तिने हे अमली पदार्थ कैदी रोविनासाठी नेल्याची धक्कादायक कबुली दिली.

आशाला शुक्रवारी न्यायालयातून जामीन मंजूर झाला असला, तरी तिने दिलेल्या कबुलीजबाबाच्या आधारे पोलिसांनी न्यायालयात अर्ज करून रोविनाच्या अटकेची परवानगी मिळविली. न्यायालयाची मंजुरी मिळताच शनिवारी पोलिसांनी रोविनाविरुद्ध एनडीपीएस कायद्याचे कलम क्र. ६७/२०२६ अन्वये आणि भारतीय कारागृह कायदा कलम ४२ अंतर्गत नवा गुन्हा नोंदवून अटक केली. या ड्रग्सपुरवठा साखळीत आणखी कोणाचा सहभाग आहे का, याचा तपास कोलवाळ पोलिस करत आहेत.

‘माझा या प्रकरणाशी काहीच संबंध नाही’

कारागृहातील ड्रग्स तस्करी प्रकरणात अटक करण्यात आलेली कैदी रोविना लोबो हिला म्हापसा येथील प्रथमवर्ग न्यायदंडाधिकारी न्यायालयाने दोन दिवसांची पोलिस कोठडी सुनावली. कारागृहात ड्रग्स जप्त झाल्यानंतर या प्रकरणाचा तपास केल्यानंतर कोलवाळ पोलिसांनी रोविनाला अटक केली होती. न्यायालयातून बाहेर पडताना प्रसारमाध्यमांच्या प्रतिनिधींनी तिला या तस्करीबाबत प्रश्न विचारले असता, तिने सर्व आरोप फेटाळले. या प्रकरणाशी माझा अजिबात संबंध नसून काहीही माहिती नसल्याचा दावा तिने केला आहे.

रोविनाची गुन्हेगारी पार्श्‍वभूमी

१. १५ नोव्हेंबर २०२० रोजी इग्रजवाडा-शिवोली येथे राज्य हादरवून टाकणारे दुहेरी हत्याकांड घडले होते.

२. पती ज्युलिओ याच्या दोन अविवाहित वृद्ध आत्या, मार्ता क्लेमेंतिना लोबो (६४) आणि व्हेरा लोबो (६२) यांच्यासोबत रोविनाचा सतत मालमत्तेवरून वाद होत होता.

३. या वादातून आणि संपत्तीच्या हव्यासापोटी रोविनाने कर्नाटकातील एका कामगाराला (सुभान राजाबली) ३० हजार रुपयांची सुपारी देऊन हत्येचा कट रचला.

४. १५ नोव्हेंबरच्या रात्री दोघांनी दोन्ही वृद्ध आत्यांच्या डोक्यावर कोयता व धारदार शस्त्राने वार करून निर्घृण हत्या केलीो.

५. खुनानंतर दोघेही घटनास्थळावरून पसार झाले. मात्र, पोलिसांनी काही तासांतच आसगावातील एका भाड्याच्या खोलीतून रोविना व तिच्या साथीदाराला अटक केली.

६. या प्रकरणात तिच्या पतीने तक्रार दिली होती, तर तिच्या मुलांनीही न्यायालयात साक्ष नोंदविली आहे.

७. पाच वर्षांहून अधिक काळ हत्येच्या गुन्ह्याखाली कारागृहात बंदिस्त असतानाही रोविनाने सुरक्षा रक्षकांना हाताशी धरून थेट तुरुंगातच गांजा मागविल्याने खळबळ उडाली आहे.