ऑस्ट्रेलियाच्या महिला क्रिकेट संघातील अनुभवी वेगवान गोलंदाज मेगन शूट हिला दोन सामन्यांसाठी निलंबित करण्यात आले आहे. प्रिस्क्रिप्शन औषधांच्या वापरासंदर्भातील नियमांचे पालन न केल्यामुळे क्रिकेट ऑस्ट्रेलियाने ही कारवाई केली आहे. गुरुवारी, २२ ऑक्टोबर रोजी बोर्डाने याबाबत माहिती दिली. या कारवाईमुळे शूटला न्यूझीलंडविरुद्धच्या तिसऱ्या टी-२० आंतरराष्ट्रीय सामन्याला मुकावे लागणार असून, महिला बिग बॅश लीग २०२६ मधील अ‍ॅडलेड स्ट्रायकर्सच्या पहिल्या सामन्यातही ती खेळू शकणार नाही.
क्रिकेट ऑस्ट्रेलियाच्या माहितीनुसार, स्पोर्ट्स सायन्स आणि स्पोर्ट्स मेडिसिनशी संबंधित मार्गदर्शक तत्त्वांनुसार प्रिस्क्रिप्शन औषधांचा वापर करण्यासाठी ठरवलेल्या नियमांचे शूटकडून उल्लंघन झाले. त्यामुळे तिच्यावर दोन सामन्यांची बंदी घालण्यात आली.
मात्र, या प्रकरणाबाबत क्रिकेट ऑस्ट्रेलियाने महत्त्वाची बाब स्पष्ट केली आहे. हे उल्लंघन स्पर्धेबाहेरील कालावधीत झाले असून, त्याचा कामगिरी सुधारण्यासाठी प्रतिबंधित औषधांचा वापर करण्याशी संबंध नव्हता, असे बोर्डाने नमूद केले आहे. खेळाडूंनी औषधांच्या वापराबाबत असलेल्या नियमांचे पालन करणे आवश्यक असल्याचेही क्रिकेट ऑस्ट्रेलियाने स्पष्ट केले.
मेगन शूटवरील निलंबन आंतरराष्ट्रीय आणि देशांतर्गत क्रिकेट या दोन्ही स्तरांवर लागू होणार आहे. त्यामुळे २२ ऑक्टोबर रोजी नॉर्थ सिडनी ओव्हल येथे न्यूझीलंडविरुद्ध होणाऱ्या तिसऱ्या आणि अखेरच्या टी-२० आंतरराष्ट्रीय सामन्यात तिला खेळता येणार नाही. या मालिकेतील निर्णायक टप्प्यावर ऑस्ट्रेलियासाठी हा महत्त्वाचा बदल ठरू शकतो.
आंतरराष्ट्रीय क्रिकेटनंतर मेगन शूटला महिला बिग बॅश लीगच्या सुरुवातीच्या सामन्यालाही मुकावे लागणार आहे. ३१ ऑक्टोबर रोजी अ‍ॅडलेड स्ट्रायकर्स आणि मेलबर्न स्टार्स यांच्यात सामना होणार आहे. या लढतीत शूटला सहभागी होता येणार नाही. त्यामुळे तिच्या अनुपस्थितीत अ‍ॅडलेड स्ट्रायकर्सला संघनिवडीचे नियोजन करावे लागेल.
या प्रकरणावर प्रतिक्रिया देताना मेगन शूटने नियमांचे पालन करण्यात झालेली चूक स्वीकारली आणि माफी मागितली. खेळाडूंना स्पोर्ट्स सायन्स आणि स्पोर्ट्स मेडिसिनशी संबंधित मार्गदर्शक तत्त्वांची नियमित माहिती दिली जाते. त्यामुळे या नियमांचे पालन करणे ही आपली जबाबदारी होती, असे तिने मान्य केले.
ही घटना मैदानाबाहेर घडली आणि तिचा क्रिकेटमधील कामगिरीशी संबंध नव्हता, असे शूटने स्पष्ट केले. मात्र, त्यामुळे नियमांचे पालन करण्याची जबाबदारी कमी होत नाही, याचीही तिने कबुली दिली. या कारवाईनंतर आता मेगन शूटच्या अनुपस्थितीत ऑस्ट्रेलियाचा संघ आगामी सामन्यांसाठी कशी रणनीती आखतो, याकडे क्रिकेट चाहत्यांचे लक्ष लागले आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.