झुआरीनगर-वास्को येथील एमईएस महाविद्यालय परिसरातील एका बंगल्यात चोरीचा प्रयत्न करणाऱ्या व पोलिसांवर गोळीबार करणाऱ्या तीन चोरट्यांपैकी एका संशयिताच्या मुसक्या आवळण्यात गोवा पोलिसांना यश आले आहे. पोलिसांनी विमानामार्गे संशयिताला गोव्यात आणले.

चोरट्यांचा पाठलाग करणाऱ्या पोलिसांवर गोळीबार झाल्‍याने राज्‍यात घबराटीचे वातावरण पसरले आहे. ही घटना सोमवारी मध्यरात्री दोनच्‍या सुमारास घडली होती. घटनेत एक पोलिस कर्मचारी जखमी झाला होता. याच तिन्‍ही चोरट्यांनी तीन दिवसांत राज्यात वेगवेगळ्या ठिकाणी चोऱ्या करून अक्षरश: धुमाकूळ घातला.

झुआरीनगर-वास्को येथील एमईएस महाविद्यालय परिसरातील बंगल्‍यात मध्‍यरात्री चोरटे घुसले होते. याबाबतची माहिती मिळताच वास्को पोलिस घटनास्थळी दाखल झाले. पोलिस आल्‍याचे कळताच चोरटे घाबरले आणि त्‍यांनी तेथून पळ काढला. मात्र पळून जाताना त्‍यांनी पोलिसांवर गोळीबार केला. यात एक पोलिस कर्मचारी जखमी झाला. 

याप्रकरणी वास्को व वेर्णा पोलिसांकडून चोरट्यांचा कसून तपास सुरू होता. पोलिसांना तिघा चोरट्यांमधील एका संशयिताला दिल्लीत पकडण्यात यश आले. विमानामार्गे संशयिताला गोव्यात आणण्यात आले. याबाबत पोलिस अधिक तपास करीत आहेत.