फोंडा : मतदारसंघात विविध विकासकामे साकारत असून रस्त्यांच्या हॉटमिक्स डांबरीकरणालाही प्रारंभ झाला आहे. साडेपाच कोटी रुपये खर्चून फोंडा बसस्थानक व बाजारपेठेतील मुख्य रस्त्याबरोबरच प्रभूनगर - कुर्टीतील रस्त्यांचेही डांबरीकरण करण्यात येत आहे. फोंडावासीयांना चांगले ते देण्याचा आपला प्रयत्न राहिला असून स्वच्छ व वाहतुकीसाठी योग्य असे रस्ते उपलब्ध करून देताना आपल्याला आनंद होत असल्याचे उद्‍गार फोंडा मतदारसंघाचे आमदार तथा कृषिमंत्री रवी नाईक यांनी काढले.

वारखंडे - फोंडा येथील हनुमान देवालय ते वरचा बाजार भागापर्यंतच्या हॉटमिक्स डांबरीकरण तसेच प्रभूनगर - सपना पार्कमधील रस्त्याच्या कामाला आज (शुक्रवारी) कृषिमंत्री रवी नाईक यांच्या हस्ते प्रारंभ करण्यात आला, त्यावेळी ते बोलत होते. यावेळी फोंड्याचे नगराध्यक्ष रितेश नाईक, नगरसेवक आनंद नाईक तसेच कुर्टी - खांडेपार पंचायतीचे पंच सदस्य नीळकंठ नाईक, हरिश नाईक, मनिष नाईक इतर पंच सदस्य, सार्वजनिक बांधकाम खात्याचे अधिकारी, कंत्राटदार आणि नागरिक उपस्थित होते.

नगराध्यक्ष रितेश नाईक यांनीही फोंडा शहरातील रस्त्यांचे हॉटमिक्स डांबरीकरण होत असल्याने फोंडावासीयांना चांगले रस्ते उपलब्ध होतील, असे सांगितले. पंच सदस्य नीळकंठ नाईक यांनीही हे डांबरीकरण नागरिकांना आता सोयिस्कर ठरेल, असे मत व्यक्त केले.

रवी नाईक म्हणाले की, फोंड्यातील रस्त्यांचे काम बराच काळ लांबले होते. फोंड्यातील मलनिस्सारण प्रकल्पाचे काम रेंगाळल्याने लोकांना खराब रस्त्यांना तोंड द्यावे लागले, पण आता ही स्थिती सुधारत असून मलनिस्सारण प्रकल्पाचे काम पूर्णत्वास येत असून फोंड्यातील बहुतांश रस्त्यांचे हॉटमिक्स करण्यात आले आहे, फक्त मुख्य रस्ता आणि इतर भाग तेवढा हॉटमिक्स डांबरीकरणाविना राहिला होता, तो आता पूर्णत्वास येत असून फोंडावासीयांना चांगल्या सुविधा देण्यास आपण कटिबद्ध असल्याची ग्वाही रवी नाईक यांनी दिली.

-सुविधा देण्यास मी कटिबद्ध : रवी नाईक