डिचोली: लाखो भक्तांचे श्रद्धास्थान असलेल्या श्री लईराई देवीच्या जत्रेपूर्वी शिरगावमधील अंतर्गत रस्ते चकाचक होणार आहेत. सार्वजनिक बांधकाम खात्यातर्फे १.२० कोटी रुपये खर्च करुन शिरगावमधील अंतर्गत रस्त्यांचे हॉटमिक्स डांबरीकरण करण्यात येणार आहे. आज गुरुवारी (ता. १७) आमदार प्रेमेंद्र शेट यांनी श्रीफळ वाढवून या कामाचा शुभारंभ केला.

यावेळी सार्वजनिक बांधकाम खात्याचे कनिष्ठ अभियंता चिमुलकर, स्थानिक सरपंच वेदिका शिरगावकर, उपसरपंच सूर्यकांत पाळणी, पंचसदस्य देवराज गावकर, मयेचे माजी सरपंच विजय पोळे, पंचसदस्य विशांत पेडणेकर, पिळगावचे पंच सुनील वायंगणकर, भाजप मंडळाचे विश्वास चोडणकर यांच्यासह भाजप कार्यकर्ते आणि ग्रामस्थ उपस्थित होते.

श्री लईराई देवीच्या जत्रा काळात शिरगावात भक्तांचा महापूर लोटत असतो. या भक्तांची गैरसोय होता कामा नये. यासाठी त्यांना आवश्यक सुविधा उपलब्ध करुन देणे हे सरकारचे कर्तव्य आहे. जत्रेपूर्वी गावातील रस्ते चकाचक होणे आवश्यक होते, असे आमदार प्रेमेंद्र शेट यांनी सांगून या कामाला सहकार्य केल्याबद्धल मुख्यमंत्री डॉ. प्रमोद सावंत यांना धन्यवाद दिले.

मये मतदारसंघातील गावागावांतील रस्ते चकाचक करण्यासाठी प्रयत्नशील आहे, अशी ग्वाही आमदारांनी दिली. शिसूर्यकांत पाळणी यांनी सरकारसह आमदारांप्रति कृतज्ञता व्यक्त केली.