Shirgaon Lairai Jatra: शिरगांवात 'होमकुंडाच्या' तयारीला सुरुवात 2 मे रोजी भरणार श्रीदेवी लईराईची जत्रा

डिचोली: गोवा हा बऱ्यापैकी इथल्या संस्कृतीसाठी ओळखला जातो. वर्षानुवर्षांपासून चालत आलेली ही संस्कृती आणि परंपरा गोव्याने आजही जपली आहे. यांपैकी एक म्हणजे डिचोली तालुक्यात शिरगांव येथे होणारी श्रीलईराई देवीची जत्रा. लईराई देवीची जत्रा आता केवळ देशातच नाही तर विदेशात देखील प्रसिद्ध होतेय. इथे देवीच्या उत्सवात मोठं होमकुंड पेटवलं जातं ज्यात देवीचे धोंड आगीतून चालतात. देवस्थानाने दिलेल्या माहितीनुसार यंदाच्यावर्षी २ मे रोजी ही जत्रा भरणार आहे.

गोव्यातील प्रसिद्ध श्रीदेवी लईराईची जत्रा व्यवस्थित पार पडावी म्हणून देवस्थान समितीकडून आत्तापासूनच कामाला सुरुवात करण्यात आलीये. यंदा २ मे रोजी देवीचा जत्रोत्सव होईल आणि त्यांनतर ३ तारीख ते ६ तारखेपर्यंत होमकुंडाचा उत्सव साजरा केला जाणार असल्याची माहिती देवस्थान समितीने दिलीये. यासाठी आवश्यक असलेली साफसफाई, रंगरंगोटी, लाकडं जवळ करण्यासारखी सर्व कामे करण्याची सामितीकडून हाती घेण्यात आलीये अशी माहिती समितीचे अध्यक्ष दीनानाथ गावकर यांनी दिली.

आत्ताच्या घडीला सर्वांजवळच वाहनांची सोय असल्याने भाविक मोठ्या संख्येत या उत्सवाला भेट देतायत, दिवसेंदिवस आकडा वाढतोय आणि सध्या भाविकांचा हा आकडा लाखोंच्या घरात पोहोचला असल्याची माहिती अध्यक्ष दीनानाथ गावकर यांनी दिली. देवीला नवस केलेला असल्यास भाविक होमकुंड पेटवण्यासाठी लाकडं आणून समर्पित करतात, मात्र होमकुंडासाठी काही विशिष्ठ लाकडांची गरज असते. इतर लाकडांच्या साहाय्याने होमकुंड पेटवलं जात नसल्याने भाविकांनी याबद्दल देवस्थान समितीशी संपर्क करावा अशी विनंती अध्यक्ष दीनानाथ गावकर यांनी केली.