मडगाव: चतुर्थीच्या काळात राज्यात एक दुर्दैवी घटना घडली. गुरुवार (दि. २८) रोजी दोन भावांचा विजेच्या संपर्कात आल्याने दुर्दैवी मृत्यू झाला आहे. रिवोणा जिल्हा परिषदेचे सदस्य, सुरेश केपेकर यांनी या घटनेची माहिती दिली.

दोन भावांचा मृत्यू

समोर आलेल्या माहितीनुसार गुरुवारी (दि.२८) पहाटे १२:४८ वाजता रिवोणा येथील पांडवसदा येथे दोन भावांचा विजेच्या तारेच्या संपर्कात आल्यामुळे मृत्यू झाला. केपे पोलीस ठाण्यात या घटनेची नोंद करण्यात आली असून पुढील तपास सुरू आहे. मृतांची नावे राजेंद्र काशिनाथ गावकर (वय ४६) आणि मोहनदास काशिनाथ गावकर (वय ४०) अशी असून, दोघेही पांडवसदा, रिवोणा येथील रहिवासी होते.

विद्युत तारेच्या संपर्कात आल्याने जागीच मृत्यू

प्राथमिक पोलीस तपासात असे समोर आले आहे की, दोघेही त्यांच्या गुरांसाठी गवत कापण्यासाठी गेले होते. गवत घेऊन परत येत असताना, शेतात वन्य प्राण्यांपासून संरक्षणासाठी लावण्यात आलेल्या विद्युत तारेचा त्यांना स्पर्श झाला. या विद्युत तारेच्या संपर्कात आल्याने त्यांचा जागीच मृत्यू झाला.

पोलिसांनी दोन्ही मृतदेह पुढील वैद्यकीय कायदेशीर प्रक्रियेसाठी मडगाव येथील दक्षिण गोवा जिल्हा रुग्णालयात पाठवले आहेत. या प्रकरणाचा पुढील तपास एलपीएसआय जॉयसी कार्व्हालो करत आहेत.