Rice Farming Destroyed In Bicholim Due To Rain

डिचोली: मोसमी पाऊस माघार कधी घेणार, याकडे सर्वांचे लक्ष लागून राहिले असतानाच रविवारी पावसाने पुन्हा धुमाकूळ घातला. परतीच्या वाटेवर असलेल्या पावसाने डिचोलीतील सर्वच भागात जोरदार तडाखा दिला. दरम्यान, जोरदार पावसामुळे डिचोलीतील बहुतेक भागातील भातपीक आडवे झाले आहे. त्यामुळे बळीराजाची चिंता वाढली आहे.

पावसाचा कहर चालूच राहिल्यास भातपीक आडवे होऊन यंदा हातातोंडाशी आलेला घास मातीमोल होण्याची भीती बळीराजाला आहे. अलीकडेच दोन दिवसांपूर्वी पडलेल्या पावसामुळे मयेसह बोर्डे आदी भागात भातशेती काही प्रमाणात आडवी झाली होती.

तरीदेखील शेतकऱ्यांना भातपीकाबाबत आशा वाटत होती. मात्र रविवारी पडलेल्या जोरदार पावसामुळे कापणीसाठी तयार झालेली भातशेती पूर्णपणे आडवी झाली आहे. त्यामुळे शेतकऱ्यांच्या आशेवर पाणी पेरले आहे. पावसाचा कहर चालूच राहिल्यास भातपिकाची नासाडी अटळ आहे, अशी खंत मये येथील शेतकरी विश्वास चोडणकर आणि नागेश नाईक यांनी व्यक्त केली.

गडगडाटासह पर्जन्यवृष्टी

विजांचा लखलखाट आणि ढगांच्या गडगडाटासह रविवारी पावसाने जोरदार तडाखा दिला. साधारण तासभर जोरदार पाऊस पडल्यानंतर पावसाची रिपरिप सुरु होती. सायंकाळी पडलेल्या जोरदार पावसामुळे जनजीवन विस्कळित होतानाच विविध भागात वाहतुकीवरही परिणाम झाला. जोरदार पर्जन्यवृष्टी झाली असली तरी सायंकाळी उशिरापर्यंत झाडांची पडझड वा अन्य कोणताही अनुचित प्रकार घडल्याचे वृत्त नाही. डिचोली अग्निशमन दलाकडूनही या वृत्तास दुजोरा मिळाला.