पणजी: रिव्‍होल्युशनरी गोवन्स पक्षाच्‍या (आरजी) शिस्तपालन समितीने निलंबित सदस्य अजय खोलकर यांना नोटीस जारी करीत, निलंबनास कारणीभूत ठरलेल्या आरोपांच्या चौकशीसाठी येत्‍या ७ ऑगस्‍ट रोजी समितीसमोर उपस्थित राहण्याचे निर्देश दिले आहे. समितीचे अध्‍यक्ष प्रवीण हळर्णकर यांनी ही नोटीस जारी केली आहे.

खोलकर यांनी ७ ऑगस्ट रोजी सायंकाळी ६.३० वा. घर क्र. ७६४/२, मालवाडा, आगशी येथे चौकशीसाठी उपस्थित राहावे. आपल्या बचावाच्या समर्थनार्थ सर्व संबंधित नोंदी आणि कागदपत्रे सोबत आणावीत, अशा सूचना समितीने केल्‍या आहेत. दरम्यान, या समितीने काही दिवसांपूर्वी दुसरे निलंबित सदस्‍य विश्‍‍वेश नाईक यांनाही अशीच नोटीस जारी केली होती; परंतु चौकशीला जाण्‍याआधीच नाईक यांनी ‘आरजी’ला रामराम केला होता.

स्वतंत्र, निष्पक्ष चौकशी

शिवाय ही एक स्वतंत्र आणि निष्पक्ष चौकशी असेल. सार्वजनिकरीत्या उपलब्ध असलेल्या संबंधित मुलाखती व कागदपत्रांचाही यावेळी विचार करण्‍यात येईल. खोलकर पुरेशा कारणाशिवाय उपस्थित राहण्यास असमर्थ ठरले, तर त्यांच्या अनुपस्थितीतच चौकशीची प्रक्रिया पुढे चालवली जाईल, असेही नोटिसीत नमूद करण्‍यात आले आहे.