पणजी : राज्यातील पंचायत निवडणुकीत रिव्होल्युशनरी गोवन्स पक्षाचे कार्यकर्ते उतरणार असून त्यांना पक्षाकडून समर्थन दिले जाणार आहे. पंचायत स्तरावरील भ्रष्टाचार संपवण्यासाठी उमेदवार उतरवण्याचे ठरविले आहे. पंचायतीत लोकांची असलेली कामे कोणत्याही अडथळ्याविना व्हावीत, हा उद्देश असल्याचे मत पक्षप्रमुख मनोज परब यांनी पणजीत पत्रकार परिषदेत व्यक्त केले.

पक्षाचे अनेक कार्यकर्ते पंचायत निवडणूक लढवण्यास इच्छुक असून त्यांना पक्षाचा पाठिंबा दिला जाईल. या पक्षाचा उद्देश पंचायत स्तरावरील विविध योजना लोकांपर्यंत पोहचवण्याचा आहे. सरकारने या निवडणुकीत ओबीसी आरक्षणात गोलमाल केले आहे. मर्जीनुसार त्यांनी हे आरक्षण केले आहे. मतदारांचा हक्क चिरडला जात आहे, असा आरोप परब यांनी केला. यावेळी त्यांच्यासोबत विश्‍वेश नाईक आणि रोहन कळंगुटकर उपस्थित होते.

राज्यातील अनेक गावांमध्ये परप्रांतीयांची संख्या वाढत असल्याने या पंचायती त्यांच्या हातात जाऊ लागल्या आहेत. दिवसेंदिवस प्रशासन पद्धत भ्रष्टाचार होऊ लागली आहे. मतदारांनाच त्यांच्या कामासाठी या पंचायत सदस्यांना लाच द्यावी लागत आहे. हे कुठे तरी थांबवण्यासाठी आरजीपीने शिक्षित तसेच प्रामाणिक कार्यकर्त्यांना निवडणुकीत उतरवून समर्थन देण्याचा निर्णय घेतला आहे. पंचायतीवर निवडून आलेले पंचसदस्य सरकारची पोपटपंची करत आहेत, असा आरोप त्यांनी केला.