Calangute Restaurant Fire: कळंगुट-बागा येथील मुख्य बाजारपेठेतील एका पब, बार कम रेस्टॉरंटला भीषण आग लागली आहे. याबाबत माहिती मिळताच अग्निशमन दलाने घटनास्थळी धाव घेतली. अग्निशमन दलाने सध्या या आगीवर नियंत्रण मिळवले आहे.

या क्लबच्या पहिल्या मजल्यावर ही आग लागली. क्षणार्धात आगीने मोठे रूप धारण केले. आग लागली तेव्हा या क्लबमध्ये काही ग्राहक होते. पण आग लागल्याचे समजताच सर्वांना सुखरूप बाहेर काढण्यात आले. अग्निशमन दलाच्या एकूण सहा गाड्या घटनास्थळी दाखल झाल्या आहेत.

याच क्लबमध्ये काही महिन्यांपुर्वी आगीची घटना घडली होती. स्थानिक प्रभाग सदस्य स्वप्नेश वायंगणकर यांनी या आगीच्या घटनेची चौकशी करावी, अशी मागणी केली आहे.

दरम्यान, आगीचे नेमके कारण कळू शकलेले नाही. शॉर्ट सर्किटमुळे आग लागल्याचा संशय व्यक्त केला जात आहे. या आगीत सध्या तरी जीवीतहानीचे कोणतेही वृत्त नाही. तथापि, रेस्टॉरंटचे मोठ्या प्रमाणात नुकसान झाले आहे. घटनास्थळी बघ्यांची प्रचंड गर्दी झाली होती.