सासष्टी: केळशी समुद्र किनाऱ्याला ‘ब्लू फ्लॅग’ प्रमाणपत्र देण्याच्या प्रस्तावाला केळशीवासीयांनी ग्रामसभेत तीव्र विरोध दर्शविला. ब्लू फ्लॅग प्रमाणपत्र दिल्यावर स्थानिक व पारंपरिक व्यावसायिकांचे काय, असा सवाल उपस्थित करण्यात आला. ग्रामपंचायतीने गोवा कोस्टल झोन मॅनेजमेंट ऑथॉरिटी व पर्यटन खात्याला विरोध कळवावा, असे सूचित करण्यात आले. ग्रामसभेच्या अध्यक्षस्थानी सरपंच डेस्मंड डायस होते.

ज्या अर्थी किनाऱ्यावर मोठे टॉवर्स उभारण्याचे काम सुरू आहे, त्या अर्थी ही ब्लू फ्लॅग प्रमाणपत्राचीच संकल्पना वाटते, असे मत उपस्थितांनी व्यक्त केले. पर्यटन सुविधा केंद्राची स्थापना करणे म्हणजे ओला व उबेरसारख्या टॅक्सीचालकांना केळशी गावात प्रवेशाला मान्यता, असा त्याचा अर्थ होतो, असे लोकांना वाटते.यावेळी आमदार वेन्झी व्हिएगश यांनी केळशीच्या विकासासाठी सर्वतोपरी सहकार्य देण्याचे आश्र्वासन दिले.