आगोंद येथे गेल्या अनेक दिवसांपासून वारंवार वीजपुरवठा खंडित होत आहे. काल ३० जून रोजीचा टी-२० विश्‍वचषक स्पर्धेतील अंतिम क्रिकेट सामनाही लोकांना पाहता आला नाही. याविषयी संबंधितांशी संपर्क साधला असता, एक तर फोन बंद असतो किंवा उचलला जात नाही.

सुदैवाने फोन उचलल्यास वीज फॉल्ट मिळत नाही, प्रयत्न सुरू आहेत, असे सांगितले जाते. आगोंद व खोला भागातील वीजपुरवठा सुरळीत करण्याची मागणी माजी सरपंच प्रमोद फळदेसाई यांनी केली आहे.

वारंवार वीज गायब होत असल्यामुळे सर्वांचेच हाल होत आहेत. विद्यार्थी वर्गाचे शैक्षणिक नुकसान होते. गृहिणींना स्वयंपाक बनविताना नाकीनऊ येत आहेत. घरातील महागडी विद्युत उपकरणे खराब होण्याच्या घटना वारंवार घडत आहेत.

मे महिन्यात वीज‌पुरवठा बंद करून वीजवाहिन्या व अन्य यंत्रणांची दुरुस्ती वीज खात्याने केली होती, तर मग हे सर्व करून नागरिकांना काय फायदा झाला, असा प्रश्न माजी सरपंच फळदेसाई यांनी केला आहे.