वास्को: मुरगाव बंदर प्राधिकरण आणि गोवा किनारपट्टी व्यवस्थापन प्राधिकरणाचे अधिकारी खारीवाडा येथे घरांची संयुक्त पाहणी (सर्वे) करण्यासाठी आले असता येथील रहिवाशांनी त्यांना हाकलून लावले. मुरगाव बंदर प्राधिकरण आणि गोवा सरकार कोळसा साठवण्यासाठी खारीवाडा येथील घरे उद्ध्वस्त करण्यासाठी उद्योगपती अदानींशी संगनमत केल्याचा आरोप यावेळी येथील रहिवाशांनी केला.

मुरगाव पालिकेच्या अधिकाऱ्यांनी 16 मार्च 2022 रोजी पोलिस फौजफाटा घेऊन खारीवाडा येथील 18 घरांच्या अनधिकृत बांधकामाचा विस्तारित भाग पाडला होता. मुरगाव पोर्ट ट्रस्टने खारीवाडा येथील बेकायदा बांधकामांबाबत उच्च न्यायालयात तक्रार दाखल केली होती.

नंतर 363 इतर बेकायदेशीर बांधकाम पैकी सुमारे 18 कुटुंबांनी त्यांच्या मालमत्तेच्या कागदपत्रासह न्यायालयात धाव घेतली होती. दरम्यान, मुरगाव नगरपालिकेने सर्वेक्षण योजनेचा भाग नसल्याने खारीवाडा येथील 18 पैकी 12 घरांचा अनधिकृत भाग जमीनदोस्त केला होता. यावेळी राजकीय नेत्यांसह संतप्त रहिवाशांनी नंतर मुरगाव पालिकेवर मोर्चा काढला आणि ती घरे पाडण्याबाबत खुलासा मागितला. पण त्यांचे प्रयत्न व्यर्थ ठरले.

दरम्यान, आज दुपारी 11 च्या दरम्यान बंदर प्राधिकरण आणि किनारपट्टी व्यवस्थापन प्राधिकरणाचे अधिकारी संयुक्त पाहणीसाठी आले असता येथील रहिवाशी भांबावून गेले. खारीवाडाच्या रहिवाशांना विश्वासात न घेता हे सर्वेक्षण चालले होते. त्या अधिकाऱ्यांना घेराव घालून त्यांच्याशी हुज्जत घालून त्यांना जाब विचारला असता ते निरुत्तर झाले आणि त्या अधिकाऱ्यांना धारेवर धरून तेथून हुसकावून लावले. यावेळी तिथे काँग्रेसचे नेते विरीयतो फर्नांडिस रहिवाशांच्या मदतीला धावून आले व त्यांनी त्या अधिकाऱ्यांनाकडून खुलासा मागितला असता त्यांना ते उत्तर देऊ शकले नाही. रहिवाशांचे आक्रमक रूप पाहून त्या अधिकाऱ्यांनी तेथून काढता पाय घेतला.