Yuri Alemao: केंद्रीय रस्ते वाहतूक आणि महामार्ग मंत्री नितीन गडकरी 22 डिसेंबर रोजी नवीन झुआरी पुलाच्या दुसऱ्या टप्प्याचे उद्‍घाटन करणार आहेत ही चांगली गोष्ट आहे, परंतु यावेळेला भाजप सरकारने पहिल्या टप्प्याच्या उद्घाटनावेळी केलेला 2 कोटींचा खर्च टाळून त्या निधीचा वापर मडगाव बसस्थानकाच्या दुरुस्तीसाठी करावा,

अशी मागणी विरोधी पक्षनेते युरी आलेमाव यांनी केली आहे. मागील विधानसभेच्या अधिवेशनात मला दिलेल्या उत्तरावरून नवीन झुआरी पुलाच्या पहिल्या टप्प्याच्या उद्‍घाटन कार्यक्रमावर सरकारने 2 कोटी रुपये खर्च केल्याचे स्पष्ट झाले आहे.

बेजबाबदार भाजप सरकारने करदात्यांच्या पैशाची उधळपट्टी केल्याचे उघड झाले आहे. राज्यावरील एकूण कर्जाचे ओझे 35 हजार कोटींवर पोचलेले असताना मुख्यमंत्री डॉ. प्रमोद सावंत यांनी खर्च कपातीवर लक्ष केंद्रित करणे आवश्यक आहे, असे युरी आलेमाव यांनी नमूद केले.

मडगाव बस स्टँड हे संपूर्ण दक्षिण गोव्याचे प्रवेशद्वार आहे. या बसस्थानकाचा शासनाच्या महसुलात वाटा आहे. या बसस्थानकातून गेल्या 4 वर्षांत शासनाला 1.93 कोटींचा नफा झाला आहे.

दुर्दैवाने तेथील बसशेडची देखभाल करण्यासही भाजप सरकार अपयशी ठरले आहे. बसस्थानकाच्या देखभाल दुरुस्तीचे काम तातडीने हाती घेण्याची गरज आहे, असे युरी आलेमाव यांनी सांगितले.