Goa Rain Updates

पणजी: मान्सूनचा हंगाम मागे पडून बराच काळ लोटला असला तरीही गोव्यात पाऊस थांबण्याचं नाव घेत नाहीये. सकाळपासून सूर असलेल्या मुसळधार पावसामुळे अनेक ठिकाणी पाणी भरल्याने वाहतूक कोंडीची समस्या निर्माण झाली.

भारतीय हवामान खात्याकडून (IMD) उत्तर आणि दक्षिण गोवा या दोन्ही जिल्ह्यांमध्ये 40-50kmph वेगाने वाहणाऱ्या वाऱ्यांचा इशारा देत आज (दि. 24 सप्टेंबर) रेड अलर्ट आणि उद्यासाठी (दि. 25 सप्टेंबर) ऑरेंज अलर्ट जारी करण्यात आला आहे.

राज्यात सुरु असलेल्या मुसळधार पावसामुळे पणजी बसस्थानक आणि आजूबाजूच्या परिसरासह अनेक भागांमध्ये पाणी साचले. पर्वरीत उड्डाणपूल बांधण्याचे काम सुरू असल्याने तिथेही पाणी साचल्याने स्थानिकांना त्रास सहन करावा लागतोय. तसेच फातोर्डा येथील दक्षिण गोवा जिल्हा रुग्णालयाच्या प्रवेशद्वारावर पाणी साचल्याची माहिती समोर आली आहे.

सध्या फोंडा येथे विशेषतः मोठ्या प्रमाणात पाऊस पडत असून साखळी, म्हापसा आणि दक्षिण गोव्यातही जोरदार पावसाची नोंद झाली आहे. काही दिवस थांबलेल्या पावसाने पुन्हा अचानक जोर धरल्याने स्थानिकांना ये-जा करण्यात व्यत्यय येतोय. पावसाचा हाच वाढता जोर पाहता अधिकाऱ्यांकडून नागरिकांना सावधगिरी बाळगण्याचा सल्ला दिला गेला आहे.