Margao LDC Recruitment

सासष्टी: मडगाव नगरपालिकेने ‘एलडीसी’च्या ११ पदांसाठी जाहिरात प्रसिद्ध केली होती. सोमवार,११ नोव्हेंबर हा अर्ज करण्याचा शेवटचा दिवस होता. सोमवारी अर्ज सादर करण्यासाठी शेकडो युवक रांगेत उभे होते. या ११ पदांसाठी दीड हजार पेक्षा जास्त अर्ज आल्याची माहिती मिळाली आहे.

शुक्रवारपर्यंतच जवळ जवळ हजार अर्ज सादर करण्यात आले होते व सोमवारी पाचशेपेक्षा जास्त इच्छुक युवकांनी अर्ज केल्याची माहिती मिळाली.

ही पदे नगरसेवकांच्या कुटुंबीयांसाठी जाहीर करण्यात आल्याची शक्यता व शंका वर्तवण्यात आल्याने काहींनी या पदांची भरती कर्मचारी भरती आयोगामार्फत व्हावी, अशी मागणीही केली होती.

नगरसेवकाच्या कुटुंबीयांसाठीच भरती?

मडगावमधील युवा सामाजिक कार्यकर्ते प्रभव नायक यांनी तर कुठल्या नगरसेवकांच्या कुटुंबीयांची या पदासाठी निवड होणार याची नावे एका लिफाफ्यात बंदच करून टाकली आहेत,असा आरोप केला आहे. त्याच बरोबर त्यांनी मुख्यमंत्र्यांनाही यात लक्ष घालावे,अशी मागणी केली आहे.