फातोर्डा: मडगाव नगरपालिकेची काही वर्षांपासून रखडून पडलेली कर थकबाकीची वसुली 21 दिवसांच्या आत 52 लाख रुपयांच्या घरात पोहोचली असल्याची माहिती नगराध्यक्ष दामोदर शिरोडकर यांनी दिली. सोनसोडो कचरा यार्डवरील कचरा समस्या सोडविण्याच्या कामालाही प्रधान्य देण्यात आले असून दर दोन दिवसांनी या ठिकाणाचा आढावा घेण्यात येत असल्याचे ते म्हणाले.

(Margaon Municipality)

मागील 15 दिवसांच्या काळात चाळीस लाख रुपये नगरपालिकेच्या तिजोरीत जमा झाले होते. आता 21 दिवसांत थकबाकी वसुली 52 लाख 13 हजार रुपयांवर आली आहे. यासाठी थकबाकी वसूल करणाऱ्या कर्मचाऱ्यांचे अभिनंदनही केले आहे. काहीवेळा खासगी वाहन वसुलीसाठी घेऊन जात आहेत. याविषयी त्यांना वाहनासाठी पेट्रोल खर्च देण्यात यावा, अशी मागणी पालिकेकडे करणार, असे त्यांनी सांगितले.

मडगाव नगरपालिकेला रोजंदारीवर काम करणाऱ्या कामगारांना महिन्याचे 38 लाख रुपये पगार द्यावा लागत आहे. याबरोबरच नगरपालिकेतील इतर कामाचा खर्च 20 लाख रुपये असा आहे. कायमस्वरूपी कामगार मिळून एकंदरीत नगरपालिकेला दर महिन्याला 2.5 कोटी रुपये बाहेर काढावे लागत आहेत.