Illegal Building: जुने गोवा परिसरात साधारण 15 हजार चौ. मी. जागेवर अतिक्रमण झाले आहे. जमिनीवर घर नसतानाही त्यांना पंचायतीने घरक्रमांक दिले गेले आहेत, परराज्यातील लोकांनी बेकायदेशीररीत्या जमिनी ताब्यात घेतल्या आहेत, असा आरोप ग्लेन काब्राल यांनी सोमवारी पत्रकार परिषदेत केलेला आहे. याप्रसंगी प्रजल साखरदांडे, शंकर पोळजी यांच्यासह इतर उपस्थित होते.

काब्राल म्हणाले, ज्या पद्धतीने यापूर्वी पेडण्याचे घर दाखवून राजकीय व्यक्तीने बेकायदा बंगला बांधल्याचा प्रकार गाजत आहे. येथे घरे नसतानाही नोंद दाखवलेली आहे. एका सर्व्हे क्रमांकावर चार घरे दाखविली आहेत, तरीही येथे एक अधिक वरील मजला अशी इतर घरे दाखविली आहेत. त्यांना घरक्रमांकही दिलेला आहे. नसलेली घरे दाखविण्याचा हा प्रकार आहे. हे लपविण्यासाठी येथील संतांची म्हणजेच सेंट फ्रान्सिस झेवियर यांचे नाव वापरून कंपन्या दाखविल्या आहेत.

परराज्यातील लोकांनी जी घरे दाखविली आहेत, तेवढीच घरे दाखवायला हवे होते. आपण पंचायतीकडे तक्रार केली आहे, त्यांनी आपणास चौकशी करू म्हणून सांगितले आहे. नसलेल्या घरांना क्रमांक दिलेले आहेत, ते २००८, २००९ मध्ये दिले गेले आहेत. त्यामुळे आता पंचायत म्हणणार आपणास त्याची माहिती नसेल, ते क्रमांक कसे दिले ते. तरीही याची चौकशी व्हायला हवी, अशी आपली मागणी आहे.