Online Scam Goa : ‘रिचार्ज पॅक’च्या नावाखाली गोकुळवाडी-साखळी एका महिलेची ४४ हजार रुपयांची फसवणूक झाल्याची माहिती समोर आली आहे. या प्रकरणी पोलिसात तक्रार दाखल करण्‍यात आली आहे.

उपलब्ध माहितीनुसार, पंधरा दिवसांपूर्वी म्हणजेच गेल्या महिन्यात गोकुळवाडा-साखळी येथील अनुषा श्रीकांत वाडकर या महिलेला तिच्या मोबाईल फोनवर दोन वेगवेगळ्या नंबरवरून अज्ञात व्यक्तीकडून कॉल आले.

‘मी एका नामांकित कंपनीचा अधिकारी आहे. रिचार्ज पॅकसाठी अमुक-अमुक पैसे भरावे लागतील’ असे सांगून त्‍या अज्ञात व्यक्तीने अनुषा हिच्या बँक खात्यासंबंधी डिटेल्स घेऊन नंतर तिची फसवणूक केली.

आपल्याला ४४ हजार ३४० रुपयांना हातोहात फसवले असल्‍याची जाणीव होताच अनुषा यांनी डिचोली पोलिसांत धाव घेतली. पोलिसांनी भारतीय न्‍यायदंड संहितेच्‍या ३१८ (२, ३ आणि ४) या कलमाखाली गुन्हा नोंद करून तपास सुरू केला आहे. डिचोली पोलिस स्थानकाचे निरीक्षक विजय राणे सरदेसाई यांच्या मार्गदर्शनाखाली तपास सुरू आहे.