Rapid Chess: चेन्नई येथील ग्रँडमास्टर आर. आर. लक्ष्मण याने अखिल भारतीय लिबरेशन कप फिडे मानांकन रॅपिड खुल्या बुद्धिबळ स्पर्धेत विजेतेपद मिळविले. क्वीन्स चेस अँड कल्चरल क्लबतर्फे घेण्यात आलेली स्पर्धा ताळगाव येथील सेंट मायकल्स कम्युनिटी सेंटरमध्ये झाली.

लक्ष्मण याने साडेसात गुण नोंदविले. कर्नाटकचा शरण राव, गुजरातचा कर्तव्य अनाडकट, गोव्याचा इंटरनॅशनल मास्टर (आयएम) नीतिश बेलुरकर, महाराष्ट्राचा आयएम सम्मेद शेटे यांनीही प्रत्येकी साडेसात गुणांची नोंद केली.

टायब्रेकर गुणांत त्यांना अनुक्रमे दुसरा ते पाचवा क्रमांक मिळाला. गोव्याचे ऋत्विज परब व देवेश नाईक यांचे समान सात गुण झाले. त्यांना अनुक्रमे सहावा व सातवा क्रमांक मिळाला.

एसए कन्नन, पार्थ साळवी, ऋषिकेश परब, आयएम विक्रमादित्य कुलकर्णी, आर्यन रायकर यांचेही सात गुण झाले. त्यांना अनुक्रमे आठवा ते बारावा क्रमांक प्राप्त झाला.

बक्षीस वितरण योगीश धेंपे, गोवा बुद्धिबळ संघटनेचे सचिव आशेष केणी यांच्या उपस्थितीत झाले. क्लबच्या अध्यक्ष रुपा बेलुरकर यांनी अहवाल सादर केला. सुनेत्रा डागरे यांनी आभार मानले, तर प्रज्ञा काकोडकर यांनी कार्यक्रमाचे सूत्रसंचालन केले.