Randeep Hooda IFFI Press Conference

पणजी: स्वातंत्र्यवीर सावरकरांविषयी आपण केवळ ऐकले होते, त्यांच्यावर साकारलेला चित्रपट खऱ्या अर्थाने आपले डोळे उघडणारा ठरला आहे. बिरसा मुंडासारखे अनेक क्रांतिकारी होऊन गेले, अशा विस्मृतीत चाललेल्या नायकांच्या आयुष्यांवर प्रकाश टाकण्यासाठी भविष्यात नक्की अशा चित्रपटांची निर्मिती केली जाईल, परंतु तशी मला आशा वाटते, असे मत प्रख्यात अभिनेता रणदीप हुडा यांनी व्यक्त केले.

इंडियन पॅनोरामामध्ये शुभारंभीचा चित्रपट म्हणून स्वातंत्र्यवीर सावरकर प्रदर्शित झाला. त्या चित्रपटानिमित्ताने नुकत्याच घेतलेल्या पत्रकार परिषदेत ते बोलत होते. स्वातंत्र्यवीर सावरकरांची भूमिकाही हुडा यांनीच साकारली आहे. हुडा यांच्याकडे पाहिल्यानंतर पोलिसांच्या विविध भूमिका नजरेसमोर येतात.

एक चोखंदळ अभिनेता म्हणून त्यांची सिनेसृष्टीत ओळख आहे. स्वातंत्र्यवीर सावरकर यांच्यासारखा चित्रपट आपण कधी करू, असे कधी वाटले नव्हते. परंतु कथा ऐकल्यानंतर तो चित्रपट करायचे ठरले. प्रत्यक्षात अंदमान निकोबार येथील सेल्युलर तुरुंगात गेल्यानंतर सावरकर कसे राहिले असतील, याची कल्पनाही करवत नव्हती.

सावरकरांना नेहमीच भारताने लष्करीदृष्ट्या सामर्थ्यवान व्हावे, असे वाटत होते. आज जगभरात आपले स्थान त्या बाबतीत लक्षणीयरित्या सुधारले आहे.

हा चित्रपट आपल्या सशस्त्र संघर्षाच्या वेगळ्या पैलूवर भर देतो आणि क्रांतीकारकांना स्वातंत्र्य मिळवण्यासाठी शस्त्रे हाती घेण्यासाठी या पैलूने कसे प्रेरित केले याचे दर्शन घडवतो.

सावरकरांच्या वैचारिक संघर्षाचा शोध

सावरकर यांच्या जीवनाचे अनेक पैलू या चित्रपटात पहायला मिळतात. सशस्त्र उठावाच्या बाजूने कट्टर भूमिका घेणारे क्रांतिकारक म्हणून त्यांचे झालेले परिवर्तन, वैचारिक संघर्ष व त्यांचा तुरुंगातील काळ यांचा हा चित्रपट शोध घेतो. इंग्रजांच्या काळात काळ्या पाण्याची शिक्षा म्हणून या ठिकाणाकडे पाहिले जात होते. पण जेलमध्ये चित्रिकरण सुरू असताना तेथे नुकतेच लग्न झालेली जोडपी आल्याचे पाहून आश्चर्य वाटले, असे रणदीपने सांगितले.