काँग्रेसमधून भाजपमध्ये जाण्याचा अयशस्वी प्रयत्न काँग्रेस आमदारांकडून केला होता. यानंतर पक्षांतर रोखण्यासाठी काँग्रेसकडून अपात्रता याचिका दाखल करण्यात आली आहे. याप्रकरणी आता माजी विरोधीपक्षनेते व कळंगुटचे आमदार मायकल लोबो (Michael Lobo) आणि माजी मुख्यमंत्री व मडगावचे आमदार दिगंबर कामत (Digambar Kamat) यांना विधानसभा सभापती रमेश तवडकर यांनी नोटीस दिली आहे. लोबो आणि कामत यांना 16 डिसेंबर रोजी आपली बाजू मांडण्यासाठी हजर राहण्याचे आदेश देण्यात आले आहेत.

गोवा प्रदेश काँग्रेसचे अमित पाटकर (GPCC) यांनी काँग्रेस आमदारांचे पक्षांतर रोखण्यासाठी विधानसभा सभापती रमेश तवडकर (Ramesh Tawadkar) यांच्याकडे अपात्र याचिका दाखल केली होती. या याचिकेवर 16 डिसेंबर रोजी दुपारी 12 वजाता पर्वरी येथील सभापतीच्या दालनात सुनावणी होणार आहे. यासाठी आमदार लोबो आणि कामत यांना उपस्थित राहवे लागणार आहे. दोघांनाही त्यांची बाजू मांडण्याची संधी दिली जाणार आहे. असे सभापती तवडकर यांनी म्हटले आहे.

काँग्रेस आमदारांनी जुलै 2022 मध्ये पक्षांतर करून भाजपमध्ये जाण्याचा प्रयत्न केला होता. यावेळी अमित पाटकर (Amit Patkar) यांनी अपात्रता याचिका दाखल केली होती. "काँग्रेसच्या दोन ज्येष्ठ नेत्यांविरोधात अपात्रता याचिका दाखल करण्यात आली आहे. दोघांनाही स्वत: पक्षाचे सदस्यत्व सोडले आहे. सर्वेाच्च न्यायालयाच्या 2020 च्या निकालानुसार कोणतेही पक्षविरोधी काम केल्यास त्यांनी पक्षाचे सदस्यत्व सोडले असा अर्थ होतो." असे अमित पाटकर म्हणाले.

दरम्यान, सप्टेंबर 14, 2022 रोजी आठ काँग्रेस आमदारांनी पक्षांतर करून भाजपमध्ये प्रवेश केला. यानंतर काँग्रेसकडून सभापती रमेश तवडकर यांच्याकडे दोन अपात्रता याचिका दाखल करण्यात आल्या आहेत. विशेष म्हणजे काँग्रेस आमदारांनी काहीही झाले तरी पक्षांतर करणार नाही यासाठी मंदीर, मशीद आणि चर्चेमध्ये जाऊन शपथ घेतली होती. तसेच, यासाठी शपथपत्र देखील सादर केले होते. दरम्यान, आठ काँग्रेस आमदारांनी पक्षांतर करून भाजपमध्ये प्रवेश केल्याने भाजपचे संख्याबळ वाढून 28 झाले आहे.