पणजी: सामाजिक कार्यकर्ते रामा काणकोणकरांना अमानुष मारहाण केल्याची धक्कादायक घटना गुरुवारी (१८ सप्टेंबर) उघडकीस आली. पाच ते सहा जणांनी वायर आणि रॉडच्या मदतीने त्यांच्यावर जीवघेणा हल्ला केला. यात काणकोणकर गंभीर जखमी झाले आहेत.

करंजाळे येथे दुपारी ही घटना घडली. काणकोणकरांना केलेल्या मारहाणीचा व्हिडिओ आता समोर आला आहे.

रामा काणकोणकरांना अमानुष मारहाण केल्याचा व्हिडिओ समोर आला असून, या व्हिडिओत पाच ते सहाजण त्यांना मारहाण करताना दिसत आहेत. काणकोणकरांना जमिनीवर पाडून पाय घट्ट पकडून चारजण त्यांना मारहाण करताना दिसत आहेत.

त्यानंतर पायाला ओढून त्यांची कपडे फाडण्यात आली. काणकोणकरांवर सातत्याने प्रहार करताना दिसत आहेत. मारहाणीत काणकोणकर वेदनेने ओरडाना दिसत आहेत.

व्हिडिओत अज्ञातांनी काणकोणकरांना अक्षरश: गुरासारखी मारहाण केल्याचे दिसत आहे. धक्कादायक बाब म्हणजे यावेळी त्यापैकी एकजण हा सर्व प्रकाराचे मोबाईलमध्ये चित्रीकरण करताना दिसत आहे.

मारहाण करुन विव्हळत पडलेल्या काणकोणकरांना त्याच ठिकाणी सोडून हल्लेखोर दुचाकीवर बसून फरार झाल्याचे दिसत आहे. करंजाळे परिसरात दिवसाढवळ्या झालेल्या या घटनेमुळे परिसरात भीतीचे वातावरण निर्माण झाले आहे.

रामा काणकोणकर सामाजिक कार्यकर्ते असून, विविध प्रश्नांवर सातत्याने आवाज उठवत असतात. काणकोणकर यांच्यावरील हल्ल्याचा सर्व स्तरातून निषेध केला जात आहे.

पोलिसांनी देखील घटनास्थळी दाखल होत पंचनामा केला असून, पुढील तपास सुरु आहे. जखमी काणकोणकरांवर रुग्णालयात उपचार सुरु आहेत. काणकोणकर यांच्यावर कोणी आणि का हल्ला केला? याबाबत अद्याप माहिती समोर आलेली नाही.