पणजी: सामाजिक कार्यकर्ते रामा काणकोणकर हल्ला प्रकरणात महत्त्वाचा आरोपी असलेल्या जेनिटो कार्दोझचा जामीन अर्ज शनिवारी (१८ ऑक्टोबर) मेरशी येथील विशेष न्यायालयाने फेटाळला आहे. त्यामुळे या प्रकरणातील आरोपींचा तुरुंगातील मुक्काम आणखी वाढला आहे.

या प्रकरणात जेनिटो कार्दोझसह एकूण आठ जणांना अटक करण्यात आली असून, सर्व संशयितांना ३१ ऑक्टोबरपर्यंत न्यायालयीन कोठडी ठोठावली गेली आहे. त्यामुळे दिवाळीपूर्वी कोणत्याही आरोपीला न्यायालयाकडून दिलासा मिळालेला नाही.

शुक्रवारी झालेल्या सुनावणीदरम्यान झेनिटो कार्दोझच्या वकिलांनी न्यायालयात जोरदार युक्तिवाद केला. बचाव पक्षाने असा दावा केला की, पोलिसांनी अटकेचे कारण स्पष्टपणे दिलेले नाही. “अटकेचा हेतू म्हणजे अटक का आवश्यक आहे हे स्पष्ट करणे गरजेचे असते; मात्र या प्रकरणात तो हेतू सांगितलेलाच नाही,” असा युक्तिवाद वकिलांनी मांडला.

कार्दोझच्या वकिलांनी पुढे सांगितले की, “झेनिटो कार्दोझवर मोबाईल फोन फॉरमॅट केल्याचा आरोप ठेवण्यात आला आहे. या कृतीसंदर्भात भारतीय न्याय संहिता कलम २३८ अंतर्गत गुन्हा दाखल करण्यात आला असून तो जामिनपात्र गुन्हा आहे.” मात्र या सर्व बाबींवरही न्यायालयाने सरकारी बाजू मान्य केली नाही.

झेनिटोच्या वकिलांनी त्याच्या अटकेला पूर्णपणे बेकायदेशीर ठरवून, “या गुन्ह्याशी त्याचा कोणताही संबंध नाही,” असा दावा केला. परंतु आता न्यायालयाने झेनिटो कार्दोझचा जामीन अर्ज फेटाळला आहे.