पणजी: सामाजिक कार्यकर्ते रामा काणकोणकर मारहाण प्रकरणातील संशयितांवर राष्ट्रीय सुरक्षा कायद्यांतर्गत (रासुका) कारवाई करण्यासाठी पोलिसांनी हालचाली सुरू केल्या आहेत. पोलिस दलाकडून तसा प्रस्ताव गृह खात्याकडे पाठवल्याची खात्रीलायक माहिती मिळाली आहे.

सूत्रांनी दिलेल्या माहितीनुसार, रासूकाचा वापर करण्यासाठी तो कायदा लागू केल्याची अधिसूचना जारी करावी लागते. त्यामुळे तसा प्रस्ताव पोलिसांनी गृह खात्याच्या विचारार्थ सादर केला आहे. सरकारने त्याला मान्यता दिल्यानंतर गृह खात्याकडून तशी अधिसूचना जारी केली जाईल त्यानंतरच रासुकांतर्गत कारवाईचे अधिकार पोलिस दलाला मिळणार आहेत.

दुसरीकडे रामा यांना न्याय देण्यासाठी सामाजिक कार्यकर्ते एकवटू लागले आहेत. मडगाव, काणकोणनंतर आता म्हापशात यासाठी सारेजण एकवटणार आहेत. चोडण बेटावरही उद्या सायंकाळी ७ वाजता मेणबत्ती फेरी काढण्यात येईल.

उत्तर गोव्यातील इतर शहरांतही अशा सभा आयोजित करण्याचे प्रयत्न सुरू करण्यात आले आहेत. सामाजिक कार्यकर्ते राज्यात सुरक्षित नाहीत असे चित्र यानिमित्ताने रेखाटण्यात येत आहे.

पणजीत आज सामाजिक कार्यकर्त्यांनी पत्रकार परिषद घेत काणकोणकर मारहाणप्रकरणाचा मुख्य सूत्रधार कोण अशी जाहीर विचारणा केली.

काणकोणकर यांच्यावर झालेल्या भीषण हल्ल्याला दहा दिवस उलटून गेले तरीही पोलीस अद्याप सूत्रधाराची ओळख पटवू शकलेले नाहीत. आठ संशयितांना अटक केल्याचा दावा पोलिसांनी केला असला तरी हल्ल्याचा खरा सूत्रधार कोण याबाबत अजूनही संभ्रम कायम आहे.

स्थानिक कार्यकर्त्यांनी या प्रकरणात सातत्याने दबाव ठेवला असून, हल्ल्याचा सूत्रधार तातडीने गजाआड करावा अशी मागणी त्यांनी केली आहे. तपासात अडथळे निर्माण होत असल्याची शंका व्यक्त करत त्यांनी राज्यपाल आणि पंतप्रधान यांना निवेदन देण्याचा निर्णय घेतला आहे.

सामाजिक कार्यकर्ते तनोज अडवलपालकर यांनी स्पष्ट केले की, सुरुवातीला पोलिसांनी संशयितांना पकडले तेव्हा आम्ही समाधानी होतो.

पण आता तपासावर राजकीय दबाव येत असल्याची शंका वाटते. गोव्याच्या जनतेला खरा सूत्रधार कोण आहे हे ठाऊक आहे. आज रामा काणकोणकर आहेत, उद्या अन्यायाविरोधात बोलणारा कुणीही निशाणा बनू शकतो.

शंकर पोळजी सांगितले की, यापूर्वीही कार्यकर्त्यांवर हल्ले झाले; पण काणकोणकरांवरील हल्ला हा प्राणघातक होता तर फिडॉल परेरा यांनी पोलिसांवर थेट टीका करत, संशयितांना न्यायालयीन कोठडीत ठेवून पोलीस काय सिद्ध करू इच्छितात? आम्ही मूर्ख नाही. खरा सूत्रधार कोण आहे हे तातडीने उघड करावे, अशी मागणी केली.