Goa Farming: राज्यात ऐन चतुर्थी उत्सवादरम्यान पाऊस पडत असल्याने गणेशभक्तांच्या उत्साहावर काही प्रमाणात विरजण पडले असले तरीदेखील हा पाऊस शेतीसाठी खूपच पोषक आहे. त्यामुळे ठरावीक अंतराने पडत असलेल्या पावसामुळे बळीराजा सुखावला आहे.

मागील महिन्याभरापासून राज्यात अपेक्षेप्रमाणे पाऊस पडला नव्हता. जमिनीत ओलावा कमी होता. जर आणखी काही दिवस पावसाविना गेले असते तर राज्यातील पिकांवर संकट ओढविण्याची शक्यता कृषी तज्नी वर्तविली होती.

काही दिवसांपूर्वी तर पावसाने ओढ दिल्याने वरुण राजाच्या प्रतीक्षेत शेतकऱ्यांच्या नजरा आभाळाकडे लागल्या होत्या. पण आता पाऊस शेतीसाठी खासकरून भातशेती पोषण घेण्याच्या काळात पडत असल्याने शेतकऱ्यांसाठी चतुर्थी सण सुखवार्ता देणारा ठरत आहे.

यंदाचा ऑगस्ट हा सर्वात उष्ण ऑगस्ट महिना ठरला. हा महिन्यातील पंधरावडा देखील उष्ण आणि पाऊस विरहित गेला. यंदा राज्यात जूनच्या मध्यात मॉन्सूनचे आगमन झाले. जुलै महिन्यात सरासरीपेक्षा अधिक रेकॉर्ड ब्रेक पाऊस पडला; परंतु ऑगस्ट महिन्यात केवळ १२ इंच पाऊस पडला.

या महिन्यात मागील दोन दिवसांपासून पाऊस पडत असून आतापर्यंत राज्यात एकूण ११९. ९२ इंच पाऊस पडला आहे. पावसाने सरासरी पार केल्याने पुढील काळात जर पाऊस पडला नाही तर भविष्यात पिकांवर संकट येण्याची शक्यता नाकारता येणार नसल्याचे कृषी तज्ज्ञांचे मत आहे.

अन्य पिकांसाठीही लाभदायक

हा पाऊस भात पिकांसोबतच काकडी, दोडका, भाजीपाला, अळूमाडी, चिबूड, कणगी तसेच इतर पिकांसाठीही पाऊस पोषक ठरत आहेत. मागील महिन्याभरापासून विविध भाजीपाल्याचे उत्पादन शेतकऱ्यांना मिळत आहे. काही दिवसांपूर्वी पावसाने ओढ दिल्यामुळे काकडी, तसेच इतर भाजी पिकांवर संकट आले होते. मात्र, आता पुढील काही दिवस जमिनीतील ओलावा कायम राहणार असल्याने समाधान व्यक्त केले जात आहे.