Online Gambling In Goa: म्हापसा पालिकेच्या गार्डनजवळ असलेल्या एका ऑनलाइन जुगार अड्ड्यावर गोवा पोलिसांच्या गुन्हा शाखेने काल संध्याकाळी छापा टाकून 7 जणांना अटक केली व त्यांच्याकडून 3.96 लाखांची रोकड मिळून 4.35 लाख रुपये किमतीचे जुगार साहित्य जप्त केले. ही कारवाई खबऱ्यांकडून मिळालेल्या माहितीच्या आधारे करण्यात आली.

संशयितांची जामिनावर सुटका करण्यात आल्याची माहिती शाखेच्या अधिकाऱ्यांनी दिली. म्हापसा नगरपालिकेच्या गार्डनजवळ असलेल्या एका दुकानात जुगार सुरू असल्याची माहिती गुप्तहेरांनी गुन्हा शाखेच्या अधिकाऱ्यांना दिली होती.

त्यामुळे रात्रीच्यावेळी तेथे छापा टाकण्याचा निर्णय वरिष्ठ अधिकाऱ्यांनी घेतला. त्यासाठी पोलिस पथक तयार करण्यात आले. अधीक्षक निधीन वाल्सन आणि उपअधीक्षक सुरज हळर्णकर यांच्या मार्गदर्शनाखाली

साहाय्यक पोलिस उपनिरीक्षक विजय अवखाले यांच्या नेतृत्वाखाली पथकाने सायंकाळी 6.20 ते 7.10 दरम्यान छापा टाकला. यावेळी त्या ठिकाणी ‘खेलो जीतो’ या नावाने ऑनलाइन जुगार सुरू असल्याचे समोर आले. त्यानंतर पथकाने खेळणाऱ्या सातजणांना ताब्यात घेतले. या जुगार खेळणाऱ्यांची झडती घेतली असता त्यांच्याकडून पथकाने 3.93 लाखांच्या रोकडसह दोन लॅपटॉप मिळून 4.35 लाख रुपये किमतीचे जुगार साहित्य जप्त केले. याप्रकरणी साहाय्यक उपनिरीक्षक विजय अवखाले पुढील तपास करीत आहेत.