पणजी: राज्याच्या अंतर्गत जलमार्ग खात्याच्यावतीने सुरू करण्यात येणाऱ्या रो-रो फेरीबोट सेवेचा शुभारंभ तीन दिवस पुढे ढकलण्यात आला आहे. ११ रोजी हा कार्यक्रम होणार होता, परंतु काही तांत्रिक कारणांमुळे हा कार्यक्रम तीन दिवस पुढे ढकलण्यात आला आहे.

खात्याने येत्या १४ रोजी रो-रो फेरीबोट सेवेचा शुभारंभ करण्याचे निश्चित केल्याची माहिती खात्याचे संचालक विक्रमसिंह राजेभोसले यांनी दिली. दरम्यान, यास खात्याचे मंत्री सुभाष फळदेसाई यांनीही दुजोरा दिला आहे. मांडवी नदीत रायबंदर ते चोडण या जलमार्गावर सर्वाधिक वाहनांची ये-जा असते.

त्याशिवाय या मार्गावर सहा फेरीबोटींना तैनात करावे लागते. त्यामुळे या मार्गावर रो-रो फेरीबोट सेवा सुरू केल्यास त्यातून चारचाकी वाहनांना, पायलट दुचाकींना तसेच पर्यटकांना भाड्याने दिल्या जाणाऱ्या दुचाकींना आकारण्यात येणाऱ्या तिकीट आकारणीतून महसूल प्राप्ती होणार आहे.

राज्य सरकारने यासाठी खास इतर राज्यांत चालणाऱ्या बोटींप्रमाणे स्थानिक विजय मरीन या कंपनीकडून बोटींची बांधणी करून घेतली आहे. रो-रो फेरीबोट सेवा सुरू झाल्यानंतर यापूर्वी फेरीबोटीला लागणाऱ्या वेळेपेक्षा कमी वेळ लागणार आहे.

‘वाहनांचे शुल्क कमी करावे’

तिसवाडी (प्रतिनिधी): रो-रो फेरीबोटीत वाहनांचे शुल्क कमी करून लोकांना दिलासा द्यावा, अशी लेखी मागणी चोडण-माडेल पंचायतीने सरकारकडे केली आहे. या मार्गावरील वाहनांच्या वाढीमुळे चोडण बेटावरील लोकांत असंतोष वाढला असून या रो-रो फेरीबोटीचे शुल्क पूर्वीप्रमाणेच रु. १०/- ठेवण्याची मागणी केली आहे.