पणजी: केरी-तेरेखोल (ता. पेडणे) किनाऱ्यावर गेल्या वर्षी झालेल्या भीषण पॅराग्लायडिंग अपघातात नेपाळी पायलट सुमन नेपाळी आणि महिला पर्यटक शिवानी दाबाळे यांचा मृत्यू झाला होता.

याप्रकरणी मेरशी येथील अतिरिक्त सत्र न्यायालयाने मुख्य संशयित ‘हाईक एन फ्लाय’ कंपनीचा मालक शेखर रायजादा (वय ४२ वर्षे) याच्यावरील सदोष मनुष्यवधाचे कलम हटविले असून आता केवळ त्याच्यावर पुराव्यांच्या आधारे कलम १०६(१) नुसार निष्काळजीपणाचा खटला सुरू राहणार आहे.

न्यायालयाने रायजादा याच्यावरील भारतीय न्याय संहिता, २०२३ च्या कलम १०५ अंतर्गत असलेले आरोप हटविले आहेत. १८ जानेवारी २०२५ रोजी केरी पठारावर पॅराग्लायडिंग करताना हा अपघात झाला होता. यात महाराष्ट्रातील पर्यटक शिवानी दाबाळे आणि सुमन नेपाळी यांचा पॅराग्लायडिंगवेळी पडून मृत्यू झाला होता. हे पॅराग्लायडिंग पर्यटन खात्याच्या परवानगीविना व सुरक्षा साधनांिवना सुरू होते, असे तपासात समोर आले होते.

पूर्वनियोजित नव्हे!

न्यायालयाने मुख्य संशयिताचा युक्तिवाद मान्य करत या प्रकरणात कलम १०५ लागू होईल इतके गंभीर पुरावे नसल्याचे स्पष्ट केले. न्यायाधीश आरतीकुमारी नाईक यांनी नमूद केले की, हा प्रकार शुद्ध निष्काळजीपणाचा आहे. पर्यटन खात्याचा परवाना नसतानाही सेवा पुरविणे हा गंभीर निष्काळजीपणा असला तरी तो पूर्वनियोजित गुन्हा मानला जाऊ शकत नाही.