Purple Festival Goa: राज्यात होणाऱ्या ९ ते १२ ऑक्टोबर दरम्यान होणाऱ्या आंतरराष्ट्रीय पर्पल महोत्सवाच्या पूर्वतयारीच्या अनुषंगाने राज्याचे समाजकल्याण मंत्री सुभाष फळदेसाई यांनी नवी दिल्लीला शिष्टमंडळासह अधिकृत भेट दिली. यावेळी त्यांनी केंद्रीय मंत्रिमंडळातील महत्त्वाच्या मंत्र्यांसोबत चर्चा केली. तसेच त्यांना महोत्सवासाठी निमंत्रणही दिले.

या शिष्टमंडळात दिव्यांगजन राज्य आयुक्त गुरुप्रसाद पावसकर यांचाही समावेश आहे. या शिष्टमंडळाने दिल्लीच्या मुख्यमंत्री रेखा गुप्ता, गृहमंत्री आशिष सूद, समाजकल्याणमंत्री रविंद्र सिंग यांचीही भेट घेतली. यावेळी शिष्टमंडळाने मुख्यमंत्री गुप्ता यांना महोत्सवाचे औपचारिक निमंत्रण दिले.

यावेळी गुप्ता यांनी या कार्यक्रमाविषयी स्वारस्य दाखविले. तसेच अशा प्रकारच्या महोत्सवाचे नवी दिल्लीत आयोजन करण्यासाठी पाठबळ व मार्गदर्शन गोव्याच्या समाजकल्याण खात्याने उपलब्ध करावे अशी विनंती केली.

यावेळी केंद्र सरकारच्या दिव्यांगजन खात्याचे अतिरिक्त सचिव मनमीत कौर नंदा, उप महासंचालक रिचा शंकर, आर्टिफिशियल लिंब मॅन्युफॅक्चरिंग कॉर्पोरेशन ऑफ इंडियाचे प्रवीण कुमार, पंकज द्विवेदी, प्रियांका सिंग व अन्य अधिकारी उपस्थित होते.