केपे: आलिशान चारचाकींची स्वप्ने पाहणाऱ्या लोकांनी पहाटे ३ वाजल्यासून केपे गाठले. केपे सार्वजनिक गणेशोत्सव मंडळाची ही सर्व कुपन अवघ्या चोवीस तासांत विकली गेली. एखाद्या गणेशोत्सव मंडळाचा हा एक विक्रमच ठरावा. आज सकाळी ७ वाजता देणगी कुपन विक्री खुली करण्यात आली होती.

केपे सार्वजनिक गणेशोत्सव मंडळाची देणगी कुपन खरेदी करण्यासाठी दरवर्षी लोकांची झुंबड उडते. लोकांची होणारी गर्दी लक्षात घेऊन मंडळाने यावर्षी बोरीमळ-केपे येथे विक्री काउंटर सुरू केला होता. त्यालाही प्रतिसाद मिळाला. यावर्षी दीड लाख कुपन विक्रीसाठी काढली गेली. प्रत्येक कुपनची किंमत ही ५०० रुपये होती. संध्याकाळी सात वाजता सर्व कुपन संपल्याचे मंडळाने जाहीर केले.

गेल्या वर्षी एक लाख कुपन

गेल्यावर्षी केपेतील या गणेशोत्सव मंडळातर्फे १ लाख कुपन छापण्यात आली होती. प्रत्येक कुपनची किंमत ही ३०० रुपये इतकी होती. यावर्षी दीड लाख कुपन छापण्यात आली असून प्रती कुपन ५०० रुपये अशी किंमत आहे. गेल्या वर्षी सुद्धा सर्व कुपन हे दोन दिवसांत संपली होती. यावर्षी सुद्धा मंडळाच्या या योजनेला प्रचंड प्रतिसाद मिळाला आहे.

केपेतील गणेश मंडळाची खासियत

राज्यात अनेक सार्वजनिक गणेशोत्सव मंडळे आहेत. त्यातील बऱ्याच मंडळांकडून दरवर्षी देणगी कुपन वितरीत केली जातात. परंतु ही कुपन विक्री करताना मंडळाच्या कार्यकर्त्यांच्या नाकीनऊ येते; पण केपे येथील सार्वजनिक गणेशोत्सव मंडळाला आपली देणगी कुपन विक्री करण्यासाठी दोन दिवससुद्धा लागत नाहीत. ही तिकिटे घेण्यासाठी लोकांची अक्षरशः झुंबड उडते.