सहा राज्यांनी त्यांच्या मंडई, कोल्ड स्टोअर्स आणि गेस्ट हाऊस एकमेकांना देण्यासाठी हातमिळवणी करण्याचा निर्णय घेतला आहे. शेतकऱ्यांना त्यांच्या उत्पादनासाठी बाजारपेठ आणि योग्य किंमत मिळू शकेल, यासाठी हा निर्णय घेण्यात आलाय.

पंजाबचे मुख्यमंत्री भगवंत मान यांच्या अध्यक्षतेखाली रविवारी चंदीगड येथे सहा राज्यांच्या मंडी मंडळांच्या अध्यक्ष आणि व्यवस्थापकीय संचालकांच्या बैठकीत या संदर्भात तोडगा काढण्यात आली.

पंजाब व्यतिरिक्त हरियाणा, उत्तराखंड, राजस्थान, गोवा आणि आसाम या राज्यांचा या बैठकीत समावेश होता.

शेतकर्‍यांच्या उत्पादनाच्या किफायतशीर किंमत मिळावी यासाठी, तसेच आंतरराज्यीय व्यापाराला आणखी प्रोत्साहन देण्यासाठी आणि लोकांना परवडणाऱ्या किमतीत दर्जेदार उत्पादनांचा पुरवठा करण्यासाठी, सर्व राज्यांनी खरेदीसाठी एक समान व्यासपीठ विकसित करण्यासाठी हातमिळवणी केली पाहिजे, असे भगवंत मान यावेळी म्हणाले.

वाढता खर्च आणि कमी उत्पन्नामुळे, शेती आता फायदेशीर व्यवसाय राहिलेली नाही. उत्पादनाच्या विपणनासाठी एक समान व्यासपीठाची कल्पना विकसित केली गेली, तर ते शेतकऱ्यांना मोठ्या प्रमाणात मदत होईल, असे पंजाबचे मुख्यमंत्री म्हणाले.

हरियाणा राज्य कृषी विपणन मंडळाचे अध्यक्ष आदित्य देवी लाल चौटाला यांच्या म्हणण्यानुसार, मान यांनी याच मुद्द्यावर शुक्रवारी हरियाणाच्या पंचकुलामध्ये आयोजित केलेल्या आंतरराज्य परिषदाप्रमाणे आंतरराज्य परिषद घेण्याचे आश्वासन दिले आहे.

पंचकुला परिषदेत, हरियाणाचे कृषी आणि शेतकरी कल्याण मंत्री जेपी दलाल यांनी शेतकऱ्यांच्या प्रगतीला चालना देण्यासाठी सर्व राज्य कृषी विपणन मंडळांनी सामायिक निधी तयार करण्याच्या गरजेवर भर देत पायाभूत सुविधा सामायिक करण्याच्या महत्त्वावरही भर दिला. दलाल यांनी विविध राज्यांतील मार्केटिंग आणि मंडी बोर्ड यांच्यात सहकार्याची भूमिका मांडली.