Ranji Cricket Trophy: रणजी करंडक क्रिकेट स्पर्धेत यावेळच्या मोहिमेतील पहिला विजय नोंदविताना पंजाबने रविवारी सकाळी गोव्याचा धुव्वा उडविला आणि सहा विकेट राखून सहज बाजी मारली. डावखुऱ्या नेहाल वधेरा याच्या आक्रमकतेच्या बळावर पाहुण्या संघाने १८.३ षटकांतच ४ बाद ९६ धावा करून आवश्यक लक्ष्य गाठले.

पर्वरी येथील मैदानावर एलिट क गटात सामन्याच्या तिसऱ्या दिवशी रविवारी सकाळी तासाभरात गोव्याचा खेळ खल्लास झाला. मयांक मार्कंडे धावबाद झाल्यानंतर अनुभवी अनमोलप्रीत सिंग (१२) याला हेरंब परब याने दीपराज गावकर याच्याकरवी झेलबाद झाले.

९४ धावांच्या आव्हानासमोर पंजाबची ४ बाद ३८ अशी स्थिती झाल्यानंतर गोव्याच्या गोटात थोडी खुशी होती, मात्र आयपीएल स्पर्धेत मुंबई इंडियन्सकडून खेळणाऱ्या २३ वर्षीय नेहालने टी-२० क्रिकेट शैलीत मुक्तपणे फलंदाजी केली.

त्याने २७ चेंडूंतच पाच चौकार व तीन षटकारांच्या मदतीने नाबाद ४९ धावा केल्या. नेहालने प्रभसिमरन सिंग (१९) याच्यासमवेत पाचव्या विकेटसाठी ३० चेंडूंतच ५८ धावांची अभेद्य भागीदारी केली. त्यामुळे पर्वरीतील मैदानावरील सर्वांत कमी कालावधीचा सामना नोंदीत झाला.

गोव्याच्या दुसऱ्या डावात ४८ धावांत ५ गडी बाद करणारा पंजाबचा २५ वर्षीय डावखुरा फिरकी गोलंदाज प्रेरित दत्ता सामन्याचा मानकरी ठरला. पंजाबचा हा चार लढतीतील पहिला विजय असून त्यांचे आता १० गुण झाले आहेत. पुढील लढतीत पंजाब संघ चंडीगडविरुद्ध खेळेल. गोव्याला चार लढतीत दुसरा पराभव पत्करावा लागला, त्यामुळे चार गुण कायम राहिले. शुक्रवारपासून (ता. २) पर्वरी येथेच बलाढ्य तमिळनाडूविरुद्ध गोव्याचा सामना होईल.

संक्षिप्त धावफलक

गोवा, पहिला डाव ः सर्वबाद १०४

पंजाब, पहिला डाव ः सर्वबाद १९०

गोवा, दुसरा डाव ः सर्वबाद १७९

पंजाब, दुसरा डाव (२ बाद १५ वरून) ः १८.३ षटकांत ४ बाद ९६ (मयांक मार्कंडे ८, अनमोलप्रीत सिंग १२, नेहाल वधेरा नाबाद ४९, प्रभसिमरन सिंग नाबाद १९, दर्शन मिसाळ ९-०-३९-१, हेरंब परब ७-०-३२-१, मोहित रेडकर २.३-०-२५-१).