म्हापसा: पुण्यातील पर्यटकाने गोव्यात गुंडगिरी करत सुरक्षा रक्षकाला कारखाली चिरडण्याचा प्रयत्न केला. यात सुरक्षा रक्षकाचा हात आणि पाय तुटला असून, त्याला उपचारासाठी गोमेकॉत दाखल करण्यात आले आहे. हणजूण पोलिसांनी संशयिताला अटक केली आहे. मंगळवारी (०८ जुलै) सकाळी दहा वाजता वागातोर येथे ही घटना घडली.

उत्तम दास (वय ३०, रा, वागातोर, मूळ आसाम) असे या अपघातात जखमी झालेल्या सुरक्षा रक्षकाचे नाव आहे. तर, हणजूण पोलिसांनी याप्रकरणी सुजन चंद्रवदन मेहता (रा. लोणावळा, पुणे) याला अटक केली आहे.

संशयित सुजन गोव्यात पर्यटनासाठी आला होता. पर्यटक वागातोर येथील व्हिला अपार्टमेंटमध्ये थांबला होता.

व्हिला अपार्टमेंटमध्ये उत्तम दास सुरक्षा रक्षक म्हणून कार्यरत आहे. परिसरात येणाऱ्या ग्राहक आणि वाहनांसाठी गेट उघडण्याचे काम त्याच्याकडे होते. संशयित देखील कारमधून वारंवार ये – जा करत होता. दास गेटजवळ असताना संशयित दासने कार मागे घेत दासला चिरडण्याचा प्रयत्न केला. यात दास गंभीर जखमी झाला आहे. यात त्यांचा हात आणि पाय तुटल्याची माहिती समोर आली आहे.

घटनेची माहिती मिळताच स्थानिकांनी घटनास्थळी धाव घेत संशयित कार चालकाला चोप दिला. यानंतर जखमी सुरक्षा रक्षकाला बाहेर काढून त्याला उपचारासाठी म्हापसा जिल्हा रुग्णालयात दाखल केले. त्यानंतर त्याला पुढील उपचारासाठी गोमेकॉत हलविण्यात आले. पोलिसांनी संशयिताला अटक केली असून, अधिक तपास सुरु आहे.

वारंवार ये – जा करावी लागतेय त्यामुळे गेट बंद न करता उघडेच ठेवावे, असे संशयित म्हणत होता. त्याच रागातून त्याने कार सुरक्षा रक्षकाच्या अंगावर घालून त्याला चिरण्याचा प्रयत्न केला, अशी माहिती समोर आली आहे. हणजूण पोलिस अधिक तपास करत आहेत.