Goa Mining:

अडवलपाल - थिवी खाण ब्लॉकसाठी उद्या (शुक्रवारी) जनसुनावणी होणार असून ‘ईआयए’ अहवाल आदी मुद्यावरून उद्याची जनसुनावणी तापण्याची शक्यता आहे. या जनसुनावणीकडे अडवलपालवासीयांसह पर्यावरणप्रेमींचेही लक्ष लागून राहिले आहे.

गोवा प्रदूषण नियंत्रण मंडळातर्फे घेण्यात येणाऱ्या उद्याच्या जनसुनावणीसाठी प्रशासकीय यंत्रणा सज्ज झाली आहे. उत्तर गोवा जिल्हाधिकारी आणि प्रदूषण नियंत्रण मंडळाच्या प्रतिनिधीच्या निरीक्षणाखाली ही जनसुनावणी होणार आहे.

जनसुनावणी सुरळीत व्हावी यासाठी मोठा पोलिस फौजफाटा तैनात करण्यात येणार आहे. पर्यावरण आघात मूल्यांकन (ईआयए) अहवाल आणि खाणव्याप्त अडवलपालवासीयांची भूमिका यावरच जनसुनावणीचे भवितव्य अवलंबून असणार आहे.

डिचोलीत जनसुनावणी : अडवलपाल - थिवी खाण ब्लॉक फोमेंतो रिसोर्सीस कंपनीच्या ताब्यात असून या खाण ब्लॉकअंतर्गत डिचोली तालुक्यातील अडवलपाल आणि बार्देश तालुक्यातील थिवीतील भाग मिळून 36.2202 हेक्टर क्षेत्रफळ येत आहे. प्रति वर्ष ०.३ मिलीयन टन खनिज उत्खनन करण्यासाठी या खाणीला पर्यावरणीय दाखला आवश्यक आहे. डिचोलीतील हिराबाई झांट्ये सभागृहात सकाळी १०.३० वाजल्यापासून ही जनसुनावणी होणार आहे. तत्पूर्वी ९ वाजल्यापासून नोंदणी प्रक्रिया सुरू होणार आहे.