Goa Congress: राज्यातील आणि केंद्रातील भाजप सरकारने सर्वसामान्य नागरिकांची घोर निराशा केली असून महागाईचा वाढता आगडोंब त्यातच बेरोजगारीचा चटका यामुळे युवावर्ग वैफल्यग्रस्त झाला असल्याचा आरोप काँग्रेसचे खासदार फ्रान्सिस सार्दिन यांनी केला.

काँग्रेस पक्ष सतर्क झाला असून फोंड्यातील जुन्या बसस्थानकावर आज शनिवारी काँग्रेसतर्फे वाढत्या महागाईच्याविरोधात आंदोलन करण्यात आले. त्यावेळी फ्रान्सिस सार्दिन बोलत होते. काँग्रेसचे प्रदेशाध्यक्ष अमित पाटकर तसेच ॲड. वरद म्हार्दोळकर आणि राजेश वेरेकर व इतर काँग्रेस नेते उपस्थित होते.

सार्दिन म्हणाले की, राज्यात वाढत्या महागाईला आळा घालण्यात सरकारला पूर्णपणे अपयश आले आहे. केवळ राज्यातच नव्हे तर संबंध देशात महागाईचा आगडोंब उसळला असून सर्वसामान्य नागरिकांचे कंबरडे भाजप सरकारने पार मोडले असल्याने या सरकारला सत्तेवर राहण्याचा कोणताही नैतिक अधिकार नाही, असे सार्दिन म्हणाले.

अमित पाटकर तसेच राजेश वेरेकर व वरद म्हार्दोळकर आणि इतर काँग्रेस नेत्यांनीही भाजप सरकारवर जोरदार हल्लाबोल करीत भाजप सरकार सर्वच आघाड्यांवर पूर्णपणे अपयशी ठरले असून रोजगार नसल्याने युवावर्ग नोकरी आणि व्यवसायासाठी धडपडत असल्याचा आरोप केला.

सरकारकडून फक्त आश्‍वासने

खाणी सुरू करण्याची केवळ आश्‍वासने दिली जात आहेत. खाणी तीन महिन्यात, सहा महिन्यात सुरू होतील, असे प्रत्येक निवडणुकीच्या वेळेला सांगितले जाते, प्रत्यक्षात मात्र काहीच केले जात नाही. खाणीद्वारे मोठ्या प्रमाणात रोजगार मिळत असल्याने खाणी कायदेशीर मार्गाने सुरू व्हायला हव्या होत्या, पण तसे न करता खाण अवलंबितांना आश्‍वासनांवर झुलवत ठेवले जात असल्याचा आरोपही काँग्रेस नेत्यांनी केला.