Anjuna Crime: उत्तर गोव्यातील वागातोर आणि शापोरा येथे रस्त्यावर वेश्वाय व्यवसाय रॅकेटमध्ये गुंतलेल्या नायजेरियन महिलांविरोधात पोलिसांत तक्रार करण्यात आली आहे. उत्तर गोव्यातील गुन्हे आणि भ्रष्टाचार नियंत्रण संघटनेचे उपाध्यक्ष चंदन मांद्रेकर यांनी याबाबत हणजुणे पोलिसांना पत्र लिहिले आहे.

या पत्रात म्हटले आहे की, वागातोर, शापोरा परिसरातील रस्त्यांवर नायजेरियन महिला मध्यरात्री उभ्या असतात. वेश्याव्यवसायाच्या उद्देशाने हॉटेल, सार्वजनिक ठिकाणे आणि पर्यटकांच्या गाड्यांजवळ या महिला फिरत असतात. त्याचा परिणाम येथील स्थानिक नागरिक, तरूण, लहान मुलांवर देखील होत आहे.

तरूणांना जाळ्याच अडकविण्याचा प्रयत्न या महिलांकडून होत आहे. पर्यटकांना आकर्षित करण्यासाठी विविध चाळे या महिला करत असतात. तरी, पोलिसांनी स्थानिकांची समस्या लक्षात घेऊन, याप्रकरणी योग्य ती कारवाई करावी, असे पत्रात म्हटले आहे.