फोंडा: गोवा डेअरीने दूध दरात वाढ करण्याबरोबरच दूध उत्पादकांनाही दिलासा दिला आहे. गोवा डेअरीला दूधपुरवठा करणाऱ्या दूध उत्पादकांना आता प्रतिलिटर दुधातील घटकांप्रमाणे किमान दोन रुपये दरवाढ जाहीर केली असून त्याची अंमलबजावणी रविवारी 1 मेपासून होणार आहे. दुसरीकडे डेअरीने दुधाच्या विक्री दरातही दरवाढ केली असून ही दरवाढ सोमवारऐवजी आता रविवार, 1 मेपासूनच लागू करण्यात येणार आहे.

गोवा डेअरीच्या दूध विक्री दरात वाढ केली असून सर्वसाधारणपणे ही दरवाढ चार ते पाच रुपयांपर्यंत असेल. गोवा डेअरीच्या स्टँडर्डाईज्ड, गाईच्या तसेच टोन्ड दुधावर प्रतिलिटर 4 रुपये तर फूल क्रिम दुधावर 5 रुपये प्रतिलिटर दरवाढ जाहीर करण्यात आली आहे.

गोवा डेअरीच्या दूध संकलनात वाढ करण्यासाठी अनेक प्रकारे प्रयत्न सुरू आहेत. सध्या साधारण 54 ते 55 हजार लिटर दुधाचे संकलन करण्यात येत असून गोव्याला परराज्यातील दुधावर विसंबून राहावे लागते. राज्याला सध्या किमान अडीच लाख लिटर दुधाची गरज असून ती भागवण्यासाठी गोव्याबाहेरील दूध डेअऱ्यांवर अवलंबून राहावे लागते.