साखळी: गेले काही दिवस तुरळकपणे पडणाऱ्या पावसाने मंगळवार, २० मे रोजी सकाळीपासून साखळी शहरात व परिसरात जोरदार वृष्टी करीत झोडून काढले. सकाळीच विजेचा लखलखाट व गडगडाटासह सुरू झालेल्या पावसाचा जोर हा संध्याकाळी बराच वाढला होता.

त्यामुळे साखळी शहरात तसेच बाजारातील अनेक रस्त्यांवर पावसाचे मातीमिश्रित पाणी साचले होते. या पावसामुळे मंगळवारी अनेक विवाह सोहळ्यांचे तीनतेरा वाजले. सकाळपासूनच जोरदार कोसळणाऱ्या पावसामुळे वधू-वरालाही वाहनांमध्ये बसताना बरीच कसरत करावी लागली.

त्याचप्रमाणे लग्नाच्या मंडळीलाही मोठी मेहनत घेऊन प्रवास करावा लागला. अनेक रस्त्यावर पाणीच पाणी असल्याने दुचाकी, चारचाकी वाहनांना तसेच लोकांनाही पाण्यातूनच वाट काढावी लागली.

नगरपालिकेला दुहेरी काम

साखळी नगरपालिकेतर्फे सध्या मान्सूनपूर्व कामांना वेग देण्यात आलेला आहे. अनेक भागांमधील गटरातील माती, कचरा काढण्यात येत असतानाच या जोरदार पावसाच्या पाण्याने गटरातील कचरा व माती रस्त्यावर आली. त्यामुळे आता नगरपालिकेला हे गटर व रस्ते साफ करण्याचे दुहेरी काम पडले आहे.