पणजी: पेडणे मतदार संघातील मगो पक्षाचे संभाव्य उमेदवार प्रवीण आर्लेकर यांचा भाजप प्रवेश निश्चित झाला आहे. 2 जानेवारीला पणजीत ते भाजपमध्ये प्रवेश करतील. या प्रवेश समारंभाला मुख्यमंत्री प्रमोद सावंत (Pramod Sawant), भाजपा प्रभारी देवेंद्र फडणवीस, पक्षाध्यक्ष सदानंद शेट तानावडे, उपस्थित राहणार आहेत.

गेल्या वर्षभरापुर्वीपासून प्रवीण आर्लेकर (Pravin Arlekar) यांनी आपण मगोप (MGP) तर्फे पेडणेमधून निवडणूक लढवणार असे जाहीर केले होते. त्यांनी मतदारसंघात सक्रिय प्रचाराला सुरुवात केली होती. गेले वर्षभर त्यांनी विविध समाज घटकांशी संपर्क साधत विद्यमान भाजपचे आमदार बाबू आजगावकर यांच्या विरोधात आवाज उठवला होता. मात्र, गेल्या काही दिवसांपासून ते भाजपच्या (BJP) संपर्कात असल्याची चर्चा होती. दरम्यान, मागील आठवड्यातच मगो पक्षाचे अध्यक्ष दीपक ढवळीकर (Deepak Dhavalikar) यांच्यासोबत पत्रकार परिषद घेऊन आपण मगो सोबतच आहे असे जाहीरही केले होते. पण दोन दिवसात घडलेल्या नाट्यमय घडामोडीनंतर आर्लेकर यांनी मगोपचा राजीनामा दिला.